Dae lunis 19 de cabudanni, in Aristanis si podet prenotare in sa piataforma de Poste italiane sos vatzinos chi balent siat pro su virus Sars CoV-2 e siat pro sa variante Omicron.
Sos vatzinos noos ant a èssere sumministrados dae giòbia 22 de cabudanni in s’ambulatòriu de sos vatzinos de Aristanis (carrera Carducci, 35), chi est abertu dae su lunis a sa chenàbura, dae sas 9.00 a sas 13.00 e su martis e sa giòbia, dae sas 15.00 a sas 18.00.
Custu vatzinu est racumandadu a totu sos chi tenent 60 annos e prus, a sos chi tenent 12 annos e prus cun fragilidade arta o chi sunt isetende sa prima dose de richiamu (tertza dose), a sos operadores sanitàrios e a su personale e a sos chi bivent in istruturas residentziales pro antzianos.
Su vatzinu si podet sumministrare ebbia si sunt passadas a su nessi 120 dies dae sa prima dose de richiamu (tertza dose) o dae s’ùrtima infetzione a pustis de su richiamu (data de su test positivu).
Francu sas fèminas prìngias, pro issas no est netzessària sa prenotatzione, sos àteros ant a èssere vatzinados ebbia si ant fatu sa prenotatzione in sa piataforma de Poste italiane, cun:
A sos operadores sanitàrios e a sos antzianos chi bivent in sas istruturas su vatzinu at a èssere fatu in loco comente sas àteras bortas.
Essende sas iscolas torra abertas, su Servìtziu de Igiene pùblica de sa Asl de Aristanis ammentat ca sos pitzinnos dae sos 5 a sos 11 annos podent fàghere sa prima dose de su vatzinu anti-Covid pediàtricu, si ancora non sunt vatzinados, o fàghere sa segunda dose, se no ant cumpletadu su tziclu de su vatzinu ca ant tentu su Covid e sunt passadas a su nessi 120 dies dae sa data de su test positivu. Fintzas pro sos chi sunt in edade pediàtrica, no est netzessària sa prenotatzione.
(MM)
