Torrant is atòbius de volontariau in s’àrea Marina Protègia de su Sinis, cuncordaus a manu de pari cun Legambiente in s'editzioni noa de “Primavera nella magia del Sinis” chi s'at a fai de su 25 de abrili a su 1de maju de su 2024.
Podint pigaai parti totu is personas chi tenint una edadi tra is 18 e is 75 annus, e chi a s'inghitzu ant a averiguai su stadu de su logu e ant a fai calincunu traballu piticheddu po pònniri a postu sa posada de sa gioventudi, e duncas po fai prus acoliosus custus logus.
Is chi faint sa domanda po pigai parti a custa atividadi de volontariau, depint sciri andai a bicicleta, tènniri gana e fortza de camminai e èssiri capassus de fai calincunu traballeddu manuali.
Custa at a èssiri finas una possibilidadi de bivi unas cantu dììs totu pigaus de sa natura de su Sinis e in cumpangia de genti chi ddis praxit meda a abarrai in logus sintzillus.
In su giassu de Legambiente fait giai a si scriri sighendi a custu link tinyurl.com/2s4ekabx.
De su 2022 su comunu de Crabas cun s’AMP e a manu de pari cun Legambiente, cuncordant campus de volontariau cun sa punna de sensibilizai is abitantis a is abbisitadoris a arrispetai s'ambienti e cun sa punna de ammellorai s'oferta de su turismu sustenìbili de s'ìsula.