Est inghitzada ariseu, 4 de martzu, sa de 8 editzionis de “Fotogrammi femminili dal mondo”chi at cuncordau su Tzentru Servìtzius Culturalis UNLA de Aristanis.
Ocannu puru at a essi unu biaxi cinemafotogràficu in su mundu sighendi su tema de sa maternidadi e, de sa sala de sa bia de Carpaccio 9, eus a biri s’Argentina, s’Iran, su Marocu e sa Frància.
Totu is pellìculas propostas ant a ammostai figuras de fèminas in logus diversus de su mundu e ant a fai spicai temas sotzialis, stòricus e de atualidadi.
Totu is proietzionis s’ant a fai movendi de is 6 e mesu de merii, in sa sala de su Tzentru Servìtzius Culturalis UNLA in sa bia de Carpaccio 9 in Aristanis. Po intrai non si pagat nudda.
Su programma est su chi sighit:
1) Lunis 4 de martzu “Maternal” de Maura Delpero, de 91 minùtus (Itàlia, Argentina – 2019), est ambientau in unu tzentru religiosu ìtalu-argentinu chi acollit mammas bagadias.
2) Lunis 11 de martzu “Il cerchio” di Jafar Panahi, de 91 minùtus (Iran – 2000), contat otu stòrias de fèminas disisperadas ambientau in unu Iran integralista e teocràticu.
3) Lunis 18 de martzu “Adam” di Maryam Touzani, de 98 minùtus (Frància – 2019), contat de duas fèminas chi s’atòpant e si connoscint.
4) Lunis 25 de martzu “Proxima” de Alice Winocour, de 107 minùtus (Frància, Germània -2019), contat de Sarah, un’astronàuta chi depit fai is contus cun su essi mamma de una pipia.
