Persighendi is atividadis de su progetu ''Guilcier in limba sarda'', s'Unioni de is Comunus de su Guilcier, a manu de pari cun s'Assòtziu Altra Cultura e s'Assòtziu Poetas Improvisadores de Ilartzi, aprontat sa primu editzioni de su prèmiu de poesia in lìngua sarda ''In sarda rima''.
Is traballus depint sighiri custas formas poèticas: mutu, otada, terzina, quartina e sonetto, e fait a ddus scriri in calisisiat variedadi de sa lìngua sarda (foras chi in is lìnguas alloglotas: tataresu, gadduresu, tabarchinu e aligheresu).
Su prèmiu previdit duas setzionis: 1. poesia a tema lìberu po is piciocheddas e piciocheddus chi frecuentant sa scola mèdia e superiori de is comunus de su Guilcier, e chi podint pigai parti a solus, in duus a prus o che classi de scola. 2 Poesia a tema lìberu po totus is poetas interessaus.
Si podit pigai parti a una setzioni feti e cun una òpera feti.
Sa partecipatzioni est a indonu e cumportat chi is chi pigant parti arriciant is arrègulas de su cuncursu.
Is òperas depint èssiri nobas e mai premiadas in àterus cuncursus. Is traballus non s'ant a torrai a is meris e s'ant a podi imperai po punnas culturalis sena paga a is autoris.
Is traballus depint lompi intra e sena sartai su 31 de su mesi de ladàmini de su 2024. Fait a ddus mandai a posta eletrònica a s'indiritzu guilcierinlimba@gmail.com ponendi a ogetu “PREMIO IN SARDA RIMA 2024 “e tocat a inditai sa setzioni sceberada. Fait finas a cunsenniai is traballus a manu in sa sea de s’Unioni de is Comunus de su Guilcier, in sa bia de Matteotti n.77, Ilartzi, a s'Ufìtziu Linguìsticu dae su lunis a sa giòbia a mangianu (9.30-12.00)
