Aristanis est torra sa prima in sa classìfica de sas provìntzias prus seguras de Itàlia.
L’atestat su raportu de su cuotidianu econòmicu Il Sole 24 Ore chi dae 33 annos faghet sa mapa de sas provìntzias italianas analizende sos datos chi descrient s’atualidade e sos cambiamentos.
Sa fotografia de su Sole 24 Ore cunfirmat s’etzellèntzia de Aristanis e de sa provìntzia in contu de giustìtzia, seguresa e òrdine pùblicu. Su resurtadu benit dae s’elaboratzione de sos datos de su Dipartimentu de Seguresa Pùblica (Ministeru de s’Internu) e dae s’Istat chi signalat Casteddu a su de 44 postos, Tàtari in su de 29 e Nùgoro in su de 36.
Si Aristanis si cunfirmat sa provìntzia prus segura de Itàlia cun 1556 denùntzias onni 100mìgia abitantes, Milanu est ancora sa provìntzia in ue b’at su nùmeru prus artu de denùntzias, 5985 semper onni 100mìgia abitantes. Sighint Rìmini, Torinu, Bologna e Roma. Aristanis, imbetzes, benit in antis de Pordenone, Sòndrio, Lodi e Ùdine.
In Aristanis sa fura in sas domos est de 46,8 pro 100mìgia abitantes. Ravenna, ùrtima, nde denùntziat 489. Semper in Aristanis non si sinnalant rapinas in carrera, mentres Nàpoli est s’ùrtima cun 57,6 onni 100mìgia abitantes. Cun s’86,2% Aristanis est sa prima finas pro sa capatzidade de pagamentu de tassas, a dae in antis de Gorìzia e de Trieste, imbetzes s’ùrtima est Isèrnia cun su 62,7%.
Resurtada bona finas pro sa fura a istratzadura (1,9 e nùmeru 5 in classìfica) e pro sas estorsiones (7,7 e nùmeru 3 in classìfica).
“Sa bona calidade de sa tzitade nostra e de sa provìntzia in contu de seguresa sunt tzertificadas ancora una borta dae una fonte de autoridade comente su Sole 24 Ore – osservat su sìndigu Massimiliano Sanna -. Dae annos meda Aristanis est in sos primos postos de custa classìfica ispetziale e est sìmbulu de seguresa e de giustìtzia. Non si podet evitare de cunfrontare custos datos cun sas raighinas culturales e sotziales nostras prus fungudas, sas chi agatant fundamentu in sa Carta de Logu de Lionora de Arbarè in tempus de sos Giudicados”.
“Semus cuntentos meda de custos datos e semus impignados onni die pro sa seguresa chi est unu valore de importu mannu pro sa gente, finas pro chie cheret fàghere impresa – agiunghet su sìndigu Sanna -. Est dovere nostru de traballare pro dare sa seguresa a sos tzitadinos e a sas impresas e pro custu, in sos annos, amus fatu paritzas cosas: acordos interistitutzionales, polìticas pro sos giòvanos, atziones cuncretas comente sa retza de sorvelliàntzia vìdeu chi oe est una de sas cosas chi blocant de prus sos crìmines de unu tzertu tipu”.
“Su raportu in contu de sa calidade de sa vida dat finas motivos de oriolu – finit su sìndigu Sanna -. Sa chirca ponet sa provìntzia nostra in su de 70 postos generale e ponet in evidèntzia sas dificultades chi pertocant richesa e consumos (su de 84 postos), afàrios e traballu (su de 73 postos), demografia, sotziedade e salude in ue tenet pesu meda s’elementu de sa natalidade (su de 103 postos), cultura e tempus lìberu (su de 83 postos), bene istare de sas fèminas (su de 70 postos). Imbetzes tenimus resurtados bonos in riferimentu a s’ambiente (su de 5 postos), gràtzias a atziones bonas, programmatzione ma finas sensibilidade e firmesa de sa gente pro sa regorta diferentziada”.
(GF.P.)
