Su sìndigu Sanna e s’assessore Zedda pedint a su presidente de sa Regione e a sos assessores a s’Ambiente e a sa Sanidade de pònnere luego in movimentu una campànnia crispa de disinfestatzione pro minimare sos perìgulos cullegados a s’isparghimentu de sa Callentura de su Nilu.
Su sìndigu sutalìniat sa gravidade de sa situatzione in tzitade, a pustis de sos 5 casos de West Nile Disease registrados in tzitade in sas dies coladas.
Su sìndigu Sanna e s’assessore a s’Ambiente Maria Bonària Zedda eris mangianu ant mandadu una comunicatzione a su presidente de sa Regione Christian Solinas, a s’assessore a s’Ambiente Gianni Lampis e a s’assessore a sa Sanidade Mario Nieddu.
“In Aristanis, a oe nch’at de seguru 5 contàgios de Callentura de su Nilu – iscrient su sìndigu e s’assessore Zedda -. Tocat de ischire luego cales sunt sos provedimentos e sas propostas de sa Regione pro parare fronte a s’isparghimentu de su virus”.
In sas dies passadas sa Callentura de su Nilu est istada su tema de una riunione de s’Unidade de Crisi regionale e b’ant partetzipadu finas su sìndigu e s’assessore Zedda. “In cussa ocasione, paris cun sos àteros sugetos istitutzionales interessados, amus averiguadu sa gravidade de sa situatzione e a su matessi tempus su bisòngiu de intervènnere luego pro amparare sa salude pùblica. Tenende contu de sas dificultades chi tenet sa Provìntzia pro assegurare un’interventu lestru e articuladu in sos terrinos pùblicos, ma finas sa dificultade a intervènnere in sos terrinos privados, tocat chi sa Regione aprontet unu programma pro fàghere una campànnia istraordinària pro disinfestare sos terrinos pùblicos e privados. Su Comune est prontu a pònnere a disponimentu onni mezu chi tenet e semus seguros chi finas sos àteros entes interessados sunt prontos a fàghere su matessi, ma su territòriu est mannu meda e traballosu e bi cheret unu livellu de interventu prus mannu, cun agiudos econòmicos e organizativos chi in tempos lestros los podet assegurare sa Regione ebbia. Totu sos provedimentos e sa collaboratzione, cunforma a sa crititzidade virale de sa West Nile Disease, in s’interessu de sa salude pùblica, cherent valutados cunforma a sas cunseguèntzias ambientales, zoo-profilàticas e sòtziu-sanitàrias pro su bene de operadores e residentes, in manera de parare fronte a un’àtera difusione de sa West Nile Disease”.
(GF.P.)
