Finas s’època de sos social est destinada a finire, comente onni cosa.
Pro sos espertos de Axios, sos social comente los amus connotos no ant a esìstere prus.
Meta, mere de Facebook e de Instagram, at detzìdidu de cambiare sighende su modellu de TikTok. Comente ispiegat Valerio Bassa, “sas retes sotziales si sunt trasformadas in prataformas de intratenimentu pro vìdeos, non prus in logos de relatzione”. A sa fine, sos “amigos” ant a contare semper prus pagu e totu nois nos amus a trasformare in pùblicu.
In antis de finire s’annu amus a bìere in Facebook pro su prus vìdeos curtzos (in Instagram est giai gasi, pro non faeddare de TikTok, chi bivet de cussu), a dannu de sos post de testu o de sos artìculos de giornale. Sas pàginas social ant a pèrdere visibilidade semper de prus e s’ùnica manera de si salvare at a èssere a s’adatare a su “modellu TikTok”, est a nàrrere a realizare vìdeos curtzos chi ant a gherrare intre issos pro otènnere visibilidade. Los at a seberare unu motore de chirca, comente càpitat in TikTok.
In custa manera sos social sunt punnende a isfidare prataformas vìdeo comente Netflix, Disney+ e Prime Vìdeo pro tenturare s’interessu de sos utentes, chi a pustis ant a bèndere a sos insertzionistas.
A palas de custos sèberos b’at resones meda. Sa prima est chi Meta (e no issa ebbia, pro neghe de sas tancaduras fatas a sos social finas dae su Gdpr europeu) tenet semper prus dificultade a balangiare bendende sos datos de sos utentes. E de su restu devet chircare de pònnere frenu a sa fortuna de TikTok, chi est semper creschende e chi in Europa l’at fatu pèrdere prus de 20 milliones de impreadores. In prus, paret chi sos contenutos sòlitos a sa gente no l’interessant prus: “Oramai vivimus totus in unu mundu TikTok” at iscritu Travis Clark in Insider.
E duncas ite fine at a fàghere su modellu de Facebook comente fiat in antis? Chie intrat a Facebook dae su computer at a agatare ancora carchi cosa posta dae sos amigos e dae sas pàginas chi sighit, mancari in logos de paga visibilidade. Imbetzes chie s’at a cullegare cun su smartphone (su prus de sa gente) los at a bìere semper prus pagu. Sa matessi cosa at a capitare pro su chi ponent sas pàginas e sos grupos. Sa “sotzialidade” at a pèrdere semper prus fortza, ant a contare ebbia sos vìdeos chi s’algoritmu at a ritènnere ispassiosos e populares.
Sara Fischer de Axio ispiegat: “Sa Generatzione Z (est a nàrrere sos chi sunt nàschidos intre su 1997 e su 2012) est faghende nàschere un’era noa de sos social media”. A pustis de annos colados a pònnere in fatu de sos “mi piace”, cun post “aboghinados” e artìculos cun tìtulos a efetu, “sos social betzos si nch’ant mandigadu sa fidàntzia de sos utentes, màssimu de sos prus giòvanos”. Sa comunicatzione intre sas persones (e intre sos grupos piticos) s’at a ispostare semper de prus in sas aplicatziones de messagìstica (comente WhatsApp e Messenger, chi sunt semper de propiedade de Meta), e sos collaboradores de Zuckerberg paret chi siant giai pensende a comente trasformare sos social pro los fàghere vìvere in su metaversu.
Ite at a sutzèdere de chie non cheret rinuntziare a su modellu Facebook? Pro issos si diant pòdere abèrrere logos noos, o forsis b’at a àere prataformas chi giai esistint chi s’ant a adatare unu pagu pro los retzire “comente est capitende – ispiegat Valerio Bassan – in Twitch, Reddit e Discord. Sos social network noos, a sa fine, sunt issos”. E Twitter? Pro s’analista Scott Rosenberg, “cale chi siat s’èsitu de sa gherra intre su social e Elon Musk, Twitter non tenet unu benidore fàtzile”.
(GF.P.)
