Sos assòtzios de gestores de carburante ant annuntziadu una protesta pro su 25 e 26 de ghennàrgiu, pro chi “nde la finant de carrigare de arga una categoria de traballadores onestos e pro chi essat a campu sa veridade” si leghet in una nota fata essire dae Faib-Confersercenti, Fegica, Figisc-Confcommercio.
Sos assòtzios de sos gestores cherent “comintzare una campagna de informatzione contrària in contu de sos impiantos”.
S’isciòperu s’at a fàghere dae sas 7 de sero (h 19,00) de su 24 de ghennàrgiu a sas 7 de mangianu de su 27 de ghennàrgiu.
“Su Guvernu – si leghet in sa nota de sos assòtzios – est creschende su prètziu de sos carburantes e est iscarrighende sa responsabilidade subra de sos gestores, chi retzint sas ofesas e sos frastimos de sos automobilistas arrennegados. Contra de sa categoria ant comintzadu una campagna mediàtica de tìmere. Duncas amus decraradu sa protesta in totu sa rete e s’isciòperu contra de su cumportamentu de su Guvernu. B’at a àere unu presìdiu suta de Montecitòrio. Sunt santifichende a sos chi faghent tràficu de illegalidade, chi sunt evasores e nche tirant a s’Istadu prus de 13 milliardos de èuros a s’annu”.
“S’idea chi tenimus comente categoria – si leghet ancora – est chi s’Esecutivu siat chirchende dinari pro ammuntare sas responsabilidades polìticas suas, sena mancu tènnere s’ànimu de pònnere sa cara in sos sèberos fatos e ischende bene ch s’Agentzia de sas Doganas, su Mimit e s’Agentzia de sas Intradas tenent, giai oe, sa connoschèntzia e sa disponibilidade de datos in contu de su movimentu, de sos prètzios de su carburante e de s’afidabilidade de sas comunicatziones fatas die cun die dae sa categoria. Est una trampa mediàtica e sos assòtzios de categoria cherent dare risposta a sa mobilitatzione de sos gestores”. In sa comunicatzione a sa Cummissione de Garantzia de s’atuatzione de sa lege de isciòperu in sos servìtzios pùblicos primàrios sas organizatziones faeddant de “atziones polìticas sena cussèntzia e de gravidade chi non si fiat bida mai in antis, contra de una categoria intrea de operadores econòmicos onestos chi fundant s’atividade issoro subra de unu balàngiu fissu de 3 tzentèsimos “brutos” a su litru, garantende a s’Istadu, a bortas in arriscu de sa vida, una intrada de 40 milliardos a s’annu de incassu”.
(GF.P.)
