Finas sa Pro Loco de Aristanis, comente sos Grèmios, sa Fondazione Oristano e s’Assessoradu a su Turismu e Cultura de su Comune de Aristanis ant ant comintzadu a organizare sas atividades chi ant a finire in su carrasegare aristanesu.
Sas novidades sunt medas, e totus rispetant sas traditziones e s’identidade de sa tzitade de Lionora.
Sa manifestatzione prus importante de sa Pro Loco at a èssere sa Sartigliedda, chi at fatu sos 40 annos de vida.
Ocannu sunt 50 annos dae cando ant comintzadu a betare su bandu (“Sa Grida”) chi si faghet in antis de sa cursa de sa domìniga e de su martis, cun un’antìtzipu sàbadu 18 de freàrgiu, e sa segunda editzione de “In antis de su Bandu” in ue Tamburinos e Trumbiteris – Pro Loco Aristanis s’ant a esibire paris cun musicantes e isbanderadores de Borgo Viatosto de Asti e de su Cuarteri Castello de Feltre. In prus, b’at a èssere comente semper su passàgiu de de sa corte de Lionora, s’ant a dare sas tzìpulas sa giòbia e s’ant a fàghere sa festa de sos coriàndulos e su “Villaggio Pro Loco” in carrera Tirsu.
In su Teatru Garau torrat su “Gran Galà della Sartiglia” paris cun Fondazione Oristano e cun su Comune de Aristanis.
Una novidade pro sa corte de Lionora: dae ocannu, su Cda de sa Pro Loco at detzìdidu chi a Lionora (Marta Frau) l’ant a acumpangiare duas cumpàngias: sa chi aiat impersonadu a sa Giuighissa s’annu in antis (Ilenia Piras, in su 2020) e sa chi l’at a fàghere s’annu chi benit (Martina Pinna de Ula, chi at a assistire cando bestint a sa reina, pro ischire comente si cumportare s’annu in fatu).
Novidades finas pro sa beneditzione de sos caddos chi, a su sòlitu, si faghet sa domìniga in antis de sa Sartìglia, in pratza Santu Efis.
Intre sos caddos, beneitos dae su pàrracu don Alessandro Floris, b’at a èssere finas su caddu de Lionora.
(GF.P.)
