De su 27 de friaxu de s’annu passau in RAI PLAY sunt a disponimentu duus tìtulus de animatzioni chi RAI Sardegna at furriau in lìngua sarda: “i Minicuccioli” e “L’Arte con Matì e Dadà”.
Po ddus podi biri bastat a circai RAI Sardegna in Rai Play o a si collegai in deretura a custu link https://www.raiplay.it/programmi/raisardegna-raisardigna, cracai asuba a “Animatzioni” e scerai su programma chi si bolit biri in su menù a tendina.
Is duus traballus ddus ant dopiaus in lìngua sarda in sa Sea Regionali Rai po sa Sardigna, cun s’agiudu de is istùdius radiufònicus de sa bia Asiago in Roma, cunforma a sa Conventzioni nàscia tra Rai Com e sa Regioni Autònoma de Sardigna – Assessoradu de S’Istrutzioni Pùblica, Benis Culturalis, Spetàculu, Sport e Informatzioni.
I Minicuccioli
“Mini cuccioli”, est unu programma de animatzioni punnau prusatotu a is pipius prus piticheddus (2-4 anni). S’òpera tenit a sugetu is primu emotzionis e is isfidas piticas chi is pipius depint afrontai ònnia dii (su prexu, sa tristesa, sa timoria de is cosas noas, sa solitùdini, s’amigàntzia, sa gelosia, is denghis e is cuaddus….)
L’arte con Matì e Dadà
S’arti cun Matì e Dadà tenit invecis duus protagonistas: Matì, una pipiedda alligra de 7 annus cun is pilus biaitus e sa passioni po sa pintura e Dadà, unu personàgiu stravanau cun sa conca a forma de ou, su corpus chi parrit unu barrallicu e una arroda a dentis in logu de unu ogu, chi ddi permitit de castiai mellus is pìnturas. Dadà tenit finas una cintorxa màgica chi ddi narant Quadrimetrò, e chi permitit a issu e a Matì de torrai agoa in su tempus po atobiai is maistus mannus de s’arti che Vincent van Gogh, Caravaggio, Picasso, Raffaello Sanzio, Michelangelo Buonarroti e molti altri.
