Sa calidade de cale si siat casu est diferente a segunda de su sartu in ue paschent sos pegos e de sa calidade de s’erba chi papant ma fintzas dae comente si faghet e dae sa manu de su pastore o de sa massaja chi ddu faghet.
Su casizolu (casigiolu) ddu faghent in Monteferru e in su Guiltzier. Est unu casu de calidade bona meda ca est fatu cun su late de sas bacas chi paschet in su sartu e papant erba bona; in Monteferru sunt sas bacas rujas (sardas-modicanas) e in Guiltzier cussas de sa ratza mèlina bruno-sardas.
Su casizolu diat chèrrere nàrrere ‘casu piticu’. A ddu fàghere bi cheret esperièntzia manna, tempus e passèntzia meda.
Ancora oe, in domos meda, su late murtu dae sos òmines ddu traballant sas fèminas pro nde fàghere casu e casizolu. Pro fàghere su casizolu si càgiat su late e si depet ispetare su puntu giustu de pesadura chi non tenet unu tempus pretzisu, ma cando est prontu tocat sighire su traballu. Sa pasta depet èssere pesada a puntu giustu e sa prova est ca, callentende∙nde unu cantu depet ‘filare’, tirende∙nde unu cantigheddu nde depet essire unu ‘filu’ chi non si depet segare luego. Cando est pronta, sa pasta si segat a fitas a intro de un’istèrgiu e si torrat a mesturare e traballare unu pagu in su fogu; fintzas chi sas fitas diventant unu cantu ebbia. Unu traballu logu e pesante: pro dare sa forma a su casizolu sas manos intrant e essint dae su soru callente e a ùrtimu dae s’abba frita pro firmare sa forma, fintzas chi no est lisu e lùdigu; a s’oras si ponet in sa salamùrgia e a pustis a assutare a manera chi sa forma abarret bella e a pustis de duas o tres dies si apicat pro sighire a assutare.
Cun s’abba de casu, s’abba de su soru, si podent coghinare minestras saboridas.
Su casizolu si faghet dae s’atòngiu a s’incomintzu de s’istiu.
Cun sa matessi pasta de su casizolu si faghet fintzas sa tritza intritzende prus partes de pasta de custu casu. Sa tritza si papat frisca ca, pro sa forma chi tenet, pro comente est cuncordada, s’assutat in presse e diventat tosta. Sas massajas prus passentziosas s’apentant a fàghere fintzas sos puzones de casu: a cantos piticos de pasta de casizolu dant formas diferentes: fruta, berdura, cartzofa, catzeddeddos, brochitas.
Su casizolu friscu tenet unu sabore durche chi diventat pitzigosu, picante, cando imbetzat.
Su Casizolu de su Monteferru est unu presìdiu Slow Food cun sos produtore chi faghent parte de s’Assòtziu Produtores Casizolu de su Monteferru.
(MM)
