Antonio Casula est torra cumandante regionale de sa Forestale. E cras, in Aristanis, su Corpus Forestale at a festare sos 177 annos dae sa nàschida.
A Casula, chi fiat cumandante de sa Forestale sarda, nde l’aiant leadu s’incàrrigu a pustis de su contu de su “pràngiu de Sàrdara”. In su mese de austu de ocannu su giùighe de su traballu at istabilidu chi a su cumandante (chi ispetantis fiat divènnidu diretore de s’Ispetoradu provintziale de Aristanis) tocaiat a lu torrare a integrare.
Cras Casula at a èssere in Aristanis. A sa tzerimònia b’at a partetzipare finas su presidente de sa Regione Christian Solinas.
Sa tzerimònia, firma dae duos annos pro neghe de sa pandemia, ponet paris sos 177 annos dae sa nàschida de su Corpus Forestale in Sardigna cun sa festa de Santu Giuanne Gualberto, patronu de sos Forestales.
Sa missa in sa Sea de Aristanis l’at a fàghere s’abate de Vallombrosa padre Giuseppe Casetta, in presèntzia de sas autoridades tziviles e militares prus artas de Sardigna e de sa rapresentàntzia de su Corpus Forestale de totu s’Ìsula.
In pratza de sa Sea b’ant a èssere sos Corpos ispetziales cun sos mezos motorizados issoro.
A sa essida de sa missa s’archipìscamu Roberto Carboni e su presidente de sa Regione Solinas ant a inaugurare, in su museu diotzesanu, sa mustra “Aurum Urens” patrotzinada dae sa Forestale e dae s’assòtziu culturale “Oristano e Oltre”, chi cun isculturas fatas cun sa linna de sos logos in ue est passadu su fogu in su 2021 cheret ammentare su valore mannu chi tenet sa natura. Valore chi sa Forestale difendet onni die cun s’impignu e sa professionalidade de sos òmines e fèminas suos.
(GF.P.)
