Est comintzadu su progetu de educatzione ambientale “Sa chirca de sa Bio diversidade” a cura de s’Assessoradu a s’Ambiente de su Comune de Aristanis e de su Ceas.
Su progetu, chi at bìnchidu unu bandu de sa Regione, s’at a fàghere in su territòriu de su Comune de Aristanis e in sa marina de Turre Manna in ue, màssimu a curtzu a sos montigros de rena, s’ant a fàghere atziones de valorizatzione de su territòriu e de amparu de sa bio diversidade chi b’est.
Intre sas atividades prevìdidas dae su progetu b’at a àere un’essida ecològica in bitzicleta, sa vìsita a su giardinu de sas bio diversidades, s’aperitivu ambientale, sa passigiada ecològica, un’escursione naturalìstica, sa creatzione de un’àrea de tutela de sas bio diversidades e atividades pro sas iscolas.
“Su sistema de sos montigros de rena a dae segus de s’ispiàgia est dìligu meda e est un’ecosistema chi cheret amparadu de prus ca, màssimu in istiu, est sugetu a càrrigos mannos de gente chi faghent dannu a prantas e animales – ponet in craru su diretore de su Ceas Antonio Ricciu -. Sa gente, gràtzias a atividades partetzipadas, at a intrare a intro de sos momentos diversos de su progetu chi previdet no atividades de ispiegatzione, formatzione e educatzione ebbia ma finas atziones de amparu fatas in su logu, in mesu de s’ambiente naturale. Su progetu cheret dare a sa comunidade percursos de esperièntzias chi potzant agiuare sa nàschida e sa crèschida de una cussèntzia ecològica, e lassare unu signale in cussas resones culturales chi càusant su cumportamentu, a manera de nd’ischidare su sensu de apartenèntzia a su territòriu e sa gana de lu contivigiare”.
“Est unu progetu chi intrat in sas polìticas comunales pro s’ambiente e pro s’amparu de su territòriu, màssimu pro cussos logos chi tenent bisòngiu de un’amparu mannu ca tenent ecosistemas dìligos – agiunghet s’assessora a s’Ambiente Maria Bonària Zedda -. Custu cumpletat in manera perfeta su progetu de 700mìgia èuros finantziadu dae pagu dae sa Regione pro megiorare s’ambiente e pro amparare e torrare a nou sos montigros de s’ispiàgia de Turre Manna. Cun s’atividade de su Ceas podimus fàghere a manera chi sa gente nos agiuet e siat protagonista e custode de s’amparu de su patrimòniu naturale. De su restu, su decoru e s’amparu de sos logos los podimus otènnere ebbia si sa gente s’impignat in prima persone”.
(GF.P.)
