Est a canta a finire su progetu “Coltiviamo la biodiversità in città” de Ceas Aristanis, chi si òcupat de educatzione ambientale e educatzione a sa sustenibilidade.
Su progetu est finantziadu dae sa Regione cun sa punna de valorizare su bene comune. L’ant a presentare giòbia 23 de làmpadas in su Tzentru pro s’Educatzione Ambientale e a sa Sustenibilidade de su Comune de Aristanis (Spazio Giovani de carrera Morosini in Sa Rodia), in un’atividade chi ponet paris sos utentes de sas ludotecas de Aristanis,.
Su progetu previdiat de realizare 4 àreas birdes in sa sede de su Ceas Aristanis: s’ortu sotziale, s’ortu de sa sustenibilidade, su buscu de sa biodiversidade e su giardinu sensoriale.
In s’ortu sotziale si ponent a cunfrontu sas connoschèntzias de coltivatzione biològica e traditzionale; curende s’ortalìtzia si podet connòschere su tziclu de vida de sas prantas.
In s’ortu de sa sustenibilidade si bi coltivat sa Luffa, una cucurbitàcea chi bogat frutos chi s’impreant pro fàghere ispòngias ecològicas, chi no incuinant.
Su buscu de sa biodiversidade est un’àrea in ue si cumprendet bene sa biodiversidade: in unu ecosistema piticheddu bi vivent paris prantas diversas e si cumprendet s’importàntzia chi tenent totu sos habitat chi sunt presentes in onni parte de su mundu.
In su giardinu sensoriale, gràtzias a unu percursu fatu a arte, pro mesu de sos 5 sensos si podent connòschere sas genias vegetales.
A custos laboratòrios b’at collaboradu 500 persones, mannas e minores, chi ant prantadu chentinas de prantas. Totu sos traballos sunt istados fatos cun fines didàticos e educativos, pro fàghere crèschere sa cultura ecològica, de rispetu de s’ambiente e de atentzione a sa comunidade.
A custu progetu b’ant leadu parte s’Assessoradu a s’Ambiente de su Comune de Aristanis, Forestas, Coop. “Il Seme”, Assòtziu “Il Seme”, Corpo Forestale, Legambiente tzìrculu “S’Arrulloni” de Terraba, Coldiretti, “Centro del Riuso”, Iscola mèdia n° 2, I.T. L. Mossa, Ludotecas.
(GF.P.)
