Màndigos a sorpresa, de mandigare in una chena a s’oscuru. Est su chi proponet sa setzione aristanesa de s’Unione italiana Tzegos e Ipovedentes pro sa festa de Santa Lughia, patrona de sa vista.
S’apuntamentu est pro martis 13 de nadale in su Cafè Rossini, carrera Gioacchino Rossini 21 in Aristanis, dae sas 7 e mesa de sero (h 19,30).
S’initziativa s’at a abèrrere cun su benebènnidu e s’arrejonu de su presidente de s’Assòtziu aristanesu, Leonardo Nurra. A pustis s’interventu de su presidente regionale Pietro Maria Manca. A sas 8 e mesa (h 20,30) totus sètzidos in mesa pro chenare.
“Amus a propònnere una chena sensoriale, pro iscobèrrere sabores e nuscos – ispiegat su presidente Nurra -. A ùrtimu nos diat agradare a intèndere sos pàrreres e sos cunsideros de chie bi partètzipat”.
Pro nd’ischire de prus e pro si prenotare si podet cuntatare su nùmeru 335-1855665.
(GF.P.)
