Rita Abis e Sara Curridori sunt duas giòvanas chi sunt organizende grupos de traballu pro imparare a faeddare in inglesu, sena pagare e abertos a totus, in Aristanis e Terraba. A pustis de tantas adesiones a custa initziativa ora tenent bisòngiu de tutor chi si chèrgiant aunire a issas pro realizare custu progetu.
“Amus tentu prus de 200 richiestas – narant Rita e Sara – e nos serbit gente pro las gestire. Chircamus a calicunu chi faeddat bene s’inglesu, non nos nd’importat de sas tzertificatziones, non semus un’iscola. Si calicunu chi at bìvidu in èsteru e faeddat bene sa limba, lu retzimus cun praghere”.
“S’ùnica cosa chi cherimus est sa voluntade – sighint sas pitzocas -. Est unu caminu gratùitu, abertu a totus, non pro balangiare dinari ca niunu nos at a pagare. Semus in chirca de gente chi chèrgiat dedicare tempus a su progetu, chi bi pòngiat s’idea pro trasmìtere s’esperièntzia sua e pònnere in parte de sas cumpetèntzias linguìsticas a chie no at tentu possibilidade de lu fàghere”.
Sos grupos s’ant a fàghere in Aristanis e in Terraba, in presèntzia ma finas online. Pro si candidare comente tutor bastat a cumpilare su mòdulu online (https://docs.google.com/forms/d/e/1FAIpQLSekZqxS4oslFRUF3ifWqyQeMv_W5V7c4vR4VnkWfFuCavjyfw/viewform)”. Sara e Rita ant a cuntatare luego sos chi mandant s’iscritzione online. “Intantu – narant – nd’aprofitamus pro torrare gràtzias a chie totu s’est iscritu e cherimus assegurare chi nos amus a fàghere intèndere cantu primu”.
(GF.P.)
