Su Comitadu provintziale pro s’Òrdine e sa Seguresa pùblica s’est riunidu eris, 17 de ghennàrgiu, in Prefetura pro ispiegare su programma orientativu de sa Sartìglia 2023, chi s’at a fàghere su 19 e su 21 de freàrgiu:
A sa riunione, coordinada dae su prefetu, b’ant partetzipadu su cuestore, sos cumandantes provintziales de sos Carabineris, de sa Guàrdia de Finàntzia e de sos Vìgiles de su Fogu, su sìndigu de Aristanis, sos presidentes de su Comitadu Sartìglia e de sa Pro Loco de Aristanis, su dirigente de sa Politzia istradale, su cumandante de sa Politzia munitzipale e sos rapresentantes de sa ASL de Aristanis e de s’Azienda Emergèntzia 118.
“Sa gente est motivada meda e b’at gana de èssere lìberos a pustis de annos dificultosos - at cummentadu su prefetu Stelo finida sa riunione -. At a èssere un’editzione cun unu programma prenu de initziativas e tantos apuntamentos musicales, gastronòmicos e culturales chi, faghende festa manna de comunidade, at a fàghere imbàtere turistas meda comente in sas editziones in antis de su Covid, gente cramada dae su mitu de sa traditzione de unu de sos carrasegares prus bellos de Itàlia”.
“Àuguro bonu traballu a totu sos chi devent traballare pro organizare sa manifestatzione – finit su prefetu – a manera chi si potzat fàghere cun cuntentesa, ma cun garantzias de seguresa màssima pro totus”.
(GF.P.)
