Chenàbura 25 de santandria s’est riunida in sa sede de Confagricoltura Aristanis sa setzione illargada chi si òcupat de su laore, pro faeddare de sa delìbera regionale aprovada su 25 de santugaine passadu dedicada a sa valorizatzione de sa lìnia de produtzione de su trigu e de su pagamentu de sos prèmios a chie betat laore e at aderidu a sa lìnia de produtzione pro s’annualidade 2022/2023.
A sos traballos b' ant partetzipadu prus de baranta sòtzios, coordinados dae su presidente nou Tonino Sanna. Ant analizadas sos cambiamentos de sos mercados e su càmbiu de esigèntzias de sos consumadores, vinculados dae sas emergèntzias mundiales reghentes: covid, gherra e crisi energètica. Totu custos eventos ant marcadu in negativu sas atividades de su setore, e sos agiudos de sa Regione non sunt bastados a dare rispostas a sos produtores primàrios, a tenore de su chi narant sos imprendidores de Confagricoltura Aristanis.
Pròpiu sa pandemia, difatis, at postu in craru chi sos rifornimentos alimentares sunt unu tema chi est cullegadu a sa visione globale noa de sos mercados, e chi sos agricultores nde sunt protagonistas.
“Sos 800mìgia èuros postos a cùrrere ocannu dae sa Regione pro favorèssere sos acordos de sa lìnia de produtzione in su setore de su laore – at ispiegadu su presidente de Confagricoltura Oristano Tonino Sanna – non bastant a sas esigèntzias beras de su setore, chi si diant pòdere cuntentare cun tres bortas tantu de sas economias. Mancari nois siamus apretende, sa polìtica est sighende in sos errores suos dedichende pagu dinari a sos progetos de valorizatzione, importantes meda pro su mundu de sa campagna, finas prus pagu de sos annos colados. Bortas meda, siat in sa Lege Omnibus siat in s’assestamentu de su bilàntziu, amus pedidu de crèschere su dinari de s’annualidade 2020/2021 tales de andare a in antis in sas graduatòrias e de permìtere s’intrada a su finantziamentu finas a sas aziendas chi nde fiant foras ca fiat finidu su dinari; finas a oe non s’est fatu nudda e sos 800mìgia èuros nde sunt signale craru” at finidu Sanna.
(GF.P.)
