“Tocat a fàghere una riunione urgente in sa presidèntzia de sa cunferèntzia de sos distretos sanitàrios pro esaminare sa situatzione de suferèntzia semper prus manna chi est bivende s’ispidale Santu Martinu de Aristanis”.
Sàbadu 14 de ghennàrgiu su sìndigu de Aristanis Massimiliano Sanna at cuncordadu un’atopu de fàghere sa chida chi intrat cun sos presidentes de sos tres Distretos sanitàrios de sa provìntzia (Luigi Tedeschi, Francesco Mereu e Stefano Licheri) e cun s’amministradore istraordinàriu de sa Provìntzia Massimo Torrente.
“Semus apensamentados dae sas novas chi benint dae s’ispidale Santu Martinu. Non faghet a suta-valutare o a lassare sena solutzione su fatu chi non sunt prus ricoverende gente in su repartu de Meighina. Tocat a dare luego una risposta pro torrare a sos livellos de assistèntzia sanitària mìnima”.
Sa riunione est cunvocada pro mèrcuris chi benit e est invitadu finas su diretore generale de sa ASL Angelo Serusi, ma dae Aristanis est movende finas un’invitu a cara a Casteddu: “Pedimus un’atopu cun s’assessore nou a sa Sanidade, Carlo Dòria. Su problema de oe in su repartu de Meighina de su Santu Martinu est s’ùrtimu ebbia. Totus connoschimus finas tropu bene sos problemas sena solutzione de sa sanidade aristanesa. Unu cunfrontu cun s’assessore regionale nou est de importu pro cumprèndere ite si cheret fàghere dae luego, pro dare rispostas a unu tema, su de sa sanidade, in ue essint a campu sos diritos printzipales de sa gente”.
(GF.P.)
