Su progetu “Aquila a life” teniat in contu de iscapare sos 33 esemplares de àbbila de Bonelli in su territòriu de Bosa e Montresta chi dae unas cantas dies sunt bolende e bivende in Sardigna. In su 2022, gràtzias a unu progetu comunitàriu nde sunt arribadas chimbe dae s’Ispagna e duas dae sa Sitzìlia. In antis de ddas iscapare sas àbbilas, pro s’ambientare a sa vida de libertade in sa natura, bivent unu perìodu in una voliera manna chi est gestida dae sos de Forestas. Cando ddas iscapant tenent unu trasmitidore Gps pro ddas controllare o chi, in casu de netzessidade, permitit de ddas agiudare.
S’assessore regionale de s’Ambiente, Lampis, at manifestadu cuntentesa pro su resurtadu de custu progetu chi in àteras regiones de Itàlia no est renèssidu bene e at torradu gràtzias a Ispra, Grefa fauna, Forestas e Corpo forestale, E-distribuzione chi partètzipant a su progetu etotu. Sa collaboratzione de sa sotziedade elètrica est de importu mannu pro limitare s’arriscu de morte pro eletrocutzione - chi est sa càusa prima de morte in Sardigna pro custos animales – aplichende sas mesuras de seguresa de sas lìnias elètricas.
Controllende de sighidu a in ue s’ispostant, sos espertos sunt istudiende sa biologia e ecologia de custa ratza cun s’ispera chi giai s’annu chi benit potzant nàschere pugioneddos dae custas àbbilas.
(MM)
