Su primu prèmiu de su cuncursu “Emozioni di Sartiglia 2021” organizadu dae sa Fondazione Oristano l’at bìnchidu Filomena Urru de Aristanis cun su contu intituladu “La raccoglitrice di coriandoli”.
Su cuncursu 2021 fiat abertu a sa prosa ebbia e teniat comente obietivu de valorizare su patrimòniu istòricu e culturale de sa Sartìglia, cun s’idea de fàghere partetzipare sos apassionados de iscritura e de lis fàghere iscrìere contos beros o inventados in tema de Sartìglia.
Sa giuria, formada dae Maria Grazia Atzeni, Santina Raschiotti e Maurizio Casu, at valutadu pro premiare sos binchidores sa capatzidade de interessare sos letores e su registru linguìsticu.
Sas òperas in gara fiant 26, pro su prus de sardos ma bi nd’aiat finas dae Bologna, Siena, Palermo e Limbiate. Su primu postu (cun prèmiu de 500 èuros) l’ant assignadu a Filomena Urru pro su contu “La raccoglitrice di coriandoli”. Su segundu prèmiu (300 èuros) a Mauro Meli de Crabas pro su contu “La prima corsa”. Su de tres (200 èuros) a Francesca Brai de Aristanis pro su contu “Un sogno chiamato Sartiglia”.
“La raccoglitrice di coriandoli” est ambientadu in sos Annos Chimbanta in Su Brugu, bighinadu de Aristanis connotu pro sos caràteres identitàrios cullegados a sa Sartìglia. Sa protagonista est una pitzinna chi abbàidat e interpretat sa Sartìglia pro mesu de sos modellos culturales chi l’at trasmìtidu su giaju.
Sa Fondazione Oristano at a fàghere una publicatzione ponende totu sas òperas chi ant partetzipadu a su cuncursu.
(GF.P.)
