Su cuncursu fait parti de su festival Comunitàriu, Traditzioni e Innovatzioni, chi ocannu bolit fueddai de s’acàpiu intra de sa traditzioni e s’innovatzioni.
Podint pigai parti totu is fotògrafas e fotògrafus e is appassionaus de fotografia chi tenint asumancu 18 annus mancai non siant residentis in su comunu de Crucuris. Si podint mandai non prus de duas fotografias.
Is fotografias s’ant a podi mandai a movi de su 22 de martzu a mesudì e finas a sa mesunoti mancu unu minutu de su 23 de su mesi de làmpadas de su 2024, imperendi sa piataforma digitali a custu indiritzu: https://festivalcomunitariocurcuris.com
Su candidau o sa candidada si depit arregistrai in sa piataforma e apustis at a depi carriai is fotografias, cun is caraterìsticas tècnicas prevididas in s’art. 3 de s’avisu cumpletu chi agatais in su giassu de su comunu de Crucuris. Po ònnia fotografia tocat a inditai su nòmini e su sanguanu de s’autori, su tìtulu de s’òpera, ita afigurat sa fotografia e finas su sentidu cosa suu.
Una giuria de spertus at a sceberai is fotografias chi a pustis ant a èssiri ammostadas in sa domu stòrica “Domu Pilloni”, in sa bia de Crèsia n.1 in Crucuris. Is fotografias duncas s’ant a podi biri in sa Domu Pilloni e finas in sa piataforma telemàtica a custu indiritzu https:// festivalcomunitariocurcuris.com, a cumentzai de su 15 de su mesi de argiolas 2024 e finas a su 31 de austu de su matessi annu.
Tres sunt is prèmius chi sa giuria at a assignai:
- 1° prèmiu: 400,00 èurus;
- 2° prèmiu: 300,00 èurus;
- 3° prèmiu: 200,00 èurus.
Sa fotografia prus votada dae su pùblicu at a arriciri unu prèmiu de 250 èurus.
Po informus e acraramentus si podint cuntatai is ufìtzius scriendi a s’indiritzu protocollo@comune.curcuris.or.it o tzerriendi a is nùmerus: 348-8136338 o 0783-91751, su lunis e su mèrcuris de is undixi e mesu a sa una de mengianu e de is cuatru a is cincu de merì.
