Ocannu puru su coru Sant'Austinu de Alà dei Sardi, cun su patrocìniu de su comunu, publicat su bandu po su cuncursu de poesia in sardu “Damus boghe a sa limba sarda”, chi est arribau a sa de ses editzionis, po avalorai sa lìngua sarda e is variedadis alloglotas de s'ìsula.
Podint pigai parti totu is sardus residentis in Sardigna, e cussus chi sunt in su continenti e foras de stadu. Is poesias sunt a tema lìberu ma depint èssiri scritas in loguduresu o campidanesu, arrispetendi is arrègulas gràficas de sa LSC, Limba Sarda Comuna, o me in is àteras variedadis de is lìnguas de Sardigna (gadduresu, tataresu, catalanu, isulanu e tabarchinu).
Is traballus bolint mandaus aintru de una busta anònima, cun una racumandada a s'ufìtziu de su protocollu de su comunu de Alà dei Sardi, in sa bia Roma 74, intra e sena sartai su 31 de su mesi de ladàmini de su 2024.
Su traballu chi bincit e is àterus chi minescint, ant a arriciri unu prèmiu e ant a èssiri lìgius in pùblicu in su cuncertu de Paschixedda de su coru de Sant'Austinu, chi s'at a fai de siguru a s'acabbu de su mesi de idas 2024.
A custu link agatais su regulamentu e sa scheda po si scriri https://www.luigiladu.it/.../ala_dei_sardi_damu_boghe_a...
Po calisisiat acraramentu fait a cuntatai su coru mandendi una mail a corosantagostino@yahoo.it
