Oe chenàbura 9 de nadale a sas 6 de sero (h 18,00) in s’Hospitalis Sancti Antoni de Aristanis s’at a fàghere sa cunferèntzia “La lingua di Eleonora – Il sardo arborense” a cura de Maurizio Virdis de s’Universidade de Casteddu.
S’initziativa est a incuru de s’ISTAR (Istituto Storico Arborense) paris cun s’Assessoradu a sa Cultura de su Comune de Aristanis e s’Assessoradu a sa Pùblica Istrutzione e Benes Culturales de sa Regione Sarda.
Ant a faeddare su sìndigu Massimiliano Sanna, s’assessore a sa Cultura Luca Faedda e su presidente de Istar Maurizio Casu. Sos traballos los at a coordinare su diretore iscientìficu de Istar Giampaolo Mele.
Sa cunferèntzia cheret dare risposta a sa pregunta “Ite limba faeddaiat Lionora?”.
“Forsis no l’amus a ischire mai – antìtzipat Maurizio Virdis -. De seguru connoschiat prus de una limba: su catalanu ca sa mama (Timbora de Roccabertì) fiat catalana; su latinu, limba internatzionale de sas segreterias de Istadu; s’italianu pro sos cuntatos intre Giuigadu de Arbarè e Toscana. E, sena duda, finas su sardu. No ischimus però cale variedade de sardu, ca sa limba est sugeta a cambiamentos finas in su faeddare de sa matessi persone. Nos diamus pòdere arriscare a nàrrere chi sa manera de faeddare de sa Giuighissa esseret sìmile a sa limba faeddada oe in su Campidanu Magiore o in su Montiferru setentrionale o in su Barigadu. Ma de seguru Lionora connoschiat e faeddaiat finas àteras variedades de limba sarda”.
Sa cunferèntzia de su 9 de nadale intrat in sas atividades de ISTAR chi in custa muta est faghende àteros sete atopos in sas iscolas de Aristanis pro faeddare de su Giuigadu de Arbarè e de sa Carta de Logu.
In s’annu 2022 b’at istadu initziativas meda: una est un’atopu internatzionale fatu unu Teatru Garau prenu de gente, in ue s’est faeddadu de sa Giuighissa; un’àtera est sa progetatzione de un’istrumentu multimediale didàticu. Est istada incarrerada s’editzione crìtica de sos “Procesos contra los Arborea” e unu libru pro fàghere connòschere sa figura de Marianu IV, chi s’at a fàghere finas in libru eletrònicu. In prus, tentu collaboratziones cun s’Archìviu Istòricu de su Comune de Aristanis, cun su CNR e cun s’Universidade, e àteras nde tenimus in cantieri. Su situ ufitziale “Arborensia”, chi bi collàborant una trintina de persones, l’impreant sas iscolas, sas universidades e paritzos apassionados finas dae èsteru”.
(GF.P.)
