Su 30 de natale 2022, in Aristanis, in sa Sala San Pio X de su Museu Diotzesanu Arborense, in Pratza de sa Catedrale 1, a sas 05,00 de sero, s’at a presentare su catàlogu de sa mustra De Insula, dall’Ottocento al contemporaneo /dae s’Otighentos a su contemporàneu.
A’espositzione, curada dae Silvia Oppo e Antonello Carboni, inaugurada su 13 de freàrgiu de ocannu, est nàschida comente initziativa ùnica e corale, promòvida dae s’Artzidiòtzesi de Aristanis e dae su Comune de Aristanis, paris cun su Museu Diotzesanu Arborense e sa Fundatzione Aristanis.
Sa mustra, cuncordada in su Museu Diotzesanu e in sa Pinacoteca Comunale Carlo Contini, at tentu esitu bonu meda dae parte de su pùblicu – sos visitadores sunt istados prus a mancu 3000 – e est istada un’eventu culturale de importu pro totu su regione.
Telas, tzeràmicas, installatziones e isculturas, sunt agiumai treghentos sas òperas chi contant comente, in prus o mancu 160 annos, siat mudadu s’istile antropològicu, sotziale e culturale. Sos curadores de sa mustra ant fintzas organizadu unos cantos addòbios formativos e de aprofundamentu temàticu in ue ant faeddadu istudiosos importantes.
In su volume b’est una seletzione manna de òperas e sàgios inèditos dedicados a su sacru, sa ritratìstica de Marghinotti, s’Iscola de Arte Aplicada de Aristanis, Giuseppe Biasi in difesa de sos artistas sardos, sas Neovanguàrdias in Sardigna e Costantino Nivola.
A sa presentatzione de su catàlogu ant a partetzipare Muns. Roberto Carboni – artzipìscamu metropolita de Aristanis, su sìndigu de Aristanis – Massimiliano Sanna, Luca Faedda – assessore a sa cultura, Francesco Deriu – presidente de sa Fundatzione Aristanis, Francesco Obino – diretore de sa Fundatzione Aristanis, Silvia Oppo – sa diretora de su Museu Diotzesanu e curadora de su catàlogu e de sa mustra e Antonello Carboni – curadore de sa mustra e de su catàlogu, autore de sa chirca chi pertocat s’Iscola de Arte Aplicada de Aristanis dirigida dae Francesco Ciusa in 1925.
Sa manifestatzione at a èssere presentada e coordinada dae Maurizio Casu, presidente dell’ISTAR.
(MM)
