Seminàriu teòricu-pràticu pro favorèssere s’isvilupu e s'aprofundamentu de sa pràtica de su
DEBATE
a incuru de Pierpaolo Pani
mèrcuris 9 e giòbia 10 de santandria 2022 dae sas 16,30 a sas 18,30
in sa sala de su CSC de Aristanis, in sa carrera Carpaccio 9
Su Tzentru Servìtzios Culturales UNLA de Aristanis at programmadu su seminàriu paris cun sa Cooperativa Sotziale OpportunEuropa.
Su debate, disciplina iscolàstica isvilupada in sos paisos anglosàssones, tenet comente punna printzipale s’isvilupu de cumpetèntzias trasversales (life skills) chi pertocant s’àrea de sa comunicatzione e de sos limbàgios. Su debate est unu cunfrontu de duas iscuadras de istudiantes chi sustenent e contraputant un’afirmatzione o un’argumentu chi ddi est istadu dadu, impreende cumpetèntzias comunicativas, oratòrias e crìticas.
Argumentos de su seminàriu:
- Ite est su dibàtidu (sos protagonistas, su tema e su formadu de dibàtidu).
- S’articulatzione de su dibàtidu (iscuadras, interventos e tempìsticas).
- Sos elementos de su dibàtidu (motzione, evidèntzia e lìnia argumentativa).
- Sas tècnicas de comunicatzione (boghe e corpus).
- Sa valutatzione de sas prestatziones de su dibàtidu.
Totu sos argumentos didàticos ant a èssere a disponimentu de sos partetzipantes paris cun sas ainas de impreu chi at a èssere possìbile.
Pierpaolo Pani est presidente de sa Cooperativa Sotziale OpportunEuropa e in sa matessi cooperativa òperat comente progetista e fatzilitadore in sos grupos de traballu de sugetos privados e pùblicos in sos partenariados chi serbint pro sa presentatzione de sas candidaduras de progetos a càrrigu de sos fundos regionales, natzionales e europeos. Su prus de su traballu suo mirat de agatare solutziones noas chi tèngiant punnas didàticu-educativas pro promòvere su benèssere de sos giòvanos. In s'àmbitu de s’acumprimentu de sas atividades de progetu pro sos giòvanos promovet e organizat su cunfrontu in contu de temàticas educativas e/o de atualidade cun sa metodologia de su Debate comente istrumentu de aprendimentu e cunfrontu.
SA PARTETZIPATZIONE A SU SEMINÀRIU EST GRATÙITA.
(MM)
