Su 5 de freàrgiu est sa Die natzionale de sa preventzione de s’isperdìtziu alimentare, ricurrèntzia pensada in su 2014 dae su programma de atividades de Spreco Zero de Last Munute Market e su Dipartimentu de Iscièntzia e Tecnologias Agroalimentares de s’Universidade de Bologna cun su Ministeru de s’Ambiente. In cussa ocasione sunt istados cunvocados sos chi tenent importu mannu in sa filiera agroalimentare italiana.
Custa ricurrèntzia est un’ocasione pro chi sa gente cumprendat, pro si cumportare a manera profetosa, sa chistione chi a dies de oe est de importu mannu.
In su mundu, ancora in su 2022, prus o mancu 155 milliones de persones sufrint su fàmene, su prus est in Àfrica e in Àsia, e s’iscàndalu est prus mannu ca, ebbia in s’Europa – ogni annu – si nche fùliant a s’àliga 88 milliones de tonnelladas de cosa de papare lassada in su pratu, produtos iscadidos e àteru. Cheret nàrrere ca su contu est de una mèdia de prus de 100 chilos de cosa de papare a persone chi si perdet a s’annu. In sos Paisos ricos una parte de tres de cosa de papare ancora bona si fùliat: pro isprecu de sos consumadores o in sa produtzione de sos alimentos prima de intrare in sa distributzione e a pustis in sas butegas.
Istùdios fatos dae su Programma de sas Natziones Unidas pro s’ambiente narant ca s’8/10% de sas emissiones globales de gas serra est dèpida pròpiu a custu isprecu. Duncas, su dannu est ancora prus mannu: sa gente morit de fàmene ma si contribuit fintzas a mudare su clima e a fàghere crèschere s’incuinamentu.
S’Agenda 2030 de s’Onu pedit a totus de si dare a ite fàghere pro chi a intro de deghe annos custu dannu siat sa metade de su chi est como.
In custa die e in àteras, assòtzios de voluntariadu regollent in sas butegas alimentos pro ddos dare a sos pòberos e a chie nde tenet bisòngiu.
(MM)
