Su 23 de santandria 2021, in s’àula de su Consìgiu de sa Provìntzia de Aristanis, si est riunida sa Cunferèntzia provintziale iscolàstica pro resonare de su Pianu provintziale de Dimensionamentu iscolàsticu 2022 – 2023 de presentare a s’Assessoradu regionale a sa Pùblica Istrutzione e presentare propostas funtzionales diferentes pro parare fronte a sas crititzidades graves de su sistema iscolàsticu provintziale.
A sa Cunferèntzia ant partetzipadu s’amministradore istraordinàriu de sa Provìntzia de Aristanis, Massimo Torrente e su dirigente de su Setore Afares Generales, Anna Paola Iacuzzi, su Dirigente de su MIUR-USP Ufìtziu VIII, Elisa Serra, sos rapresentantes de sos Comunes de Tramatza, Abbasanta, Soddie, Boroneddu, Norghiddo, Abas, Milis, Sèdilo, Aidumajore, Tadasune e de sas Uniones de sos Comunes “Montiferru Artu Campidanu” e “Unione de su Comunes de su Guilcer”. Ant partetzipadu, in prus, dirigentes iscolàsticos e sos rapresentantes sindacales de ANIEF e SLALS CONFSAL.
In sa discussione est essida a pìgiu una situatzione crìtica meda de su sistema iscolàsticu provintziale, cun un’unione progressiva de sas iscolas, aplicadu in custos annos, chi peorat s’ispopulamentu giai grave de sos comunes piticos
Sa Cunferèntzia cunfirmat cun fortza sa netzessidade chi sa Regione impreet critèrios noos pro su dimensionamentu iscolàsticu, netzessàrios pro tènnere unu sistema de istrutzione de calidade, innovativu e avantzadu, adatu a sas caraterìsticas insediativas, geogràficas e infrastruturales de sa Sardigna, chi potzat garantire un’istrutzione giusta e adeguada a totus e fàghere fronte a sa dispersione iscolàstica.
Pro su chi est su contenutu pretzisu de su pianu de dimensionamentu, Sa Cunferèntzia provintziale at aprovadu tres propostas de mudadura:
- sa prima, presentada dae s’Unione de sos Comunes de su Guilcer, dae su Comune de Paulle e dae s’Istitutu Cumprensivu de Ilartzi e afortiada fintzas dae una regorta importante de firmas in su territòriu, previdit de torrare a organizare sas autonomias iscolàsticas de su territòriu de su Guilcier, cun sa creatzione de un’Istitutu Globale o, si nono, cunsideradu s’ispopulamentu de sos comunes piticos e sos ìnditzes atuales de natalidade, sa rivalutatzione de sos paràmetros in vigore pro mantènnere sas autonomias: dae 600 a 500 e dae 400 a 300 pro sos comunes montanos e ìsulas piticas
- sa de duas, presentada dae s’Istitutu de Istrutzione superiore Pischedda de Bosa, iscola giai connota comente Cambridge International School, previdit s’ativatzione de su LITZEO LINGUÌSTICU. S’indiritzu nou de custa iscola est acapiadu a sos bisòngios de su territòriu e rapresentat un’oportunidade formativa de importu pro sos istudiantes.
- sa de tres propostas previdit sa domanda de abèrrere sedes noas de erogatzione de su servìtziu de istrutzione pro adultos in s’Istitutu Cumprensivu de Ilartzi, in s’Istitutu Cumprensivu de Bosa e in sa sede de Aristanis I.I.S. Don Deodato Meloni de Aristanis / Comune de Aristanis, pro dare rispostas a sos bisòngios formativos diferentes chi bi sunt in su territòriu comente cussos de sos furisteris chi tenent dificultade cun sa limba, sa crèschida de sas cumpetèntzias e su recùperu formativu de sos sugetos chi ant lassadu sos istùdios.
Su materiale propedèuticu a s’elaboratzione de su Pianu de dimensionamentu si podet consultare in su situ de a Provìntzia di Aristanis (www.provincia.or.it.) Canali / Scuole. Sos datos sunt istados elaborados leende in contu sas informatziones dadas dae sos ufìtzios territoriales de su MIUR e dae sos istitutos iscolàsticos de su territòriu.
(MM)X
