Dae oe, 14 de santandria 2022, su Servìtziu de Igiene e Sanidade pùblica de sa Asl n. 5 dat sa possibilidade de fàghere su vatzinu contra de s’influèntzia.
Sunt 30.000 sas doses postas a disponimentu de sos tzitadinos de su territòriu aristanesu pro amparare sa populatzione dae s’influèntzia chi ocannu at a èssere prus mala. A pustis de àere vatzinadu sos antzianos chi bivent in sos ricòveros e in sas istruturas residentziales de sa provìntzia e su personale sanitàriu, como su vatzinu est a disponimentu de totu sos tzitadinos.
Su vatzinu contra de s’influèntzia est indicadu pro totu sos chi tenent prus de 6 meses e chi no apant contraindicatziones pretzisas e est racumandadu e non ddu depent pagare sos chi current un’arriscu prus mannu de tènnere cumplicàntzias: sos chi tenent prus de 65 annos; sos chi, sentza leare in cunsideru s’edade, tenent maladias chi aumentant s’arriscu de cumplicàntzias (diabete, pressione arta, asma e àteras maladias crònicas a su coro o a sos purmones, tumores, maladias neuromuscolares e de su fìgadu, Hiv/Aids); fèminas prìngias; persones ricoveradas in istruturas pro ricòveros longos; familiares e cuntatos de sugetos cun s’arriscu mannu de cumplicàntzias.
Su vatzinu est gratis fintzas pro sos chi traballant in sos servìtzios pùblicos essentziales, comente sos dotores (mèigos) e su personale sanitàriu, sa politzia, pompieris, e sos chi sunt a cuntatu cun sas animales, comente sos pastores, sos chi trasportant animales bios e sos chi ddos masellant, sos veterinàrios.
Su vatzinu est racumandadu meda de ddu fàghere fintzas a sos chi donant su sàmbene, a sos pitzinnos dae sos 6 meses a sos 6 annos e a sos chi tenent dae 60 e 64 annos.
Su vatzinu si podet fàghere, sentza si prenotare, in
Aristanis
carrera Carducci, n. 35 – 1u pianu
Dae mèrcuris 16 de santandria, ogni mèrcuris e chenàbura, dae sas 15.00 a sas 18.00
(fintzas a 200 persones ogni borta)
Crabas
carrera Tharros
Dae mèrcuris 16 de santandria, ogni mèrcuris, dae sas 15.00
Tramatza
carrera Marconi, n.2
Martis 22 de santandria, 6 de nadale, 20 de nadale, dae sas 14.00 a sas 18.00
Nurachi
carrera S.Lucia
Sàbadu 19 e 26 de santandria, dae sas 9.00 a sas 13.30
Samugheo
carrera della Pace
Dae sàbadu 19 santandria, ogni sàbadu, dae 8.30 a sas 14.00
Simaghis
in su Tzentru sotziale
Dae Martis 22 santandria, ogni martis e giòbia, dae sas 14.00 a sas 17.30
Bosa
Carrera Amsicora, n.1
Dae mèrcuris 16 de santandria, ogni mèrcuris, dae sas 15.00 a sas 18.00
Ilartzi
pratza de Santu Prameri, n.1
Dae mèrcuris 16 de santandria, ogni mèrcuris, dae sas 8.30 a sas 13.30 e dae sas 14.30 a sas 17.30
Abas
Carrera IV novembre, n.30
Dae martis 15 de santandria, ogni martis, dae sas 15.00 a sas 18.00
Terraba
Viale Sardegna, n.74
Dae lunis 14 de santandria, ogni lunis, dae sas 15.00 a sas 18.00
Tocat a si leare infatu sa tèssera sanitària.
Pro èssere vatzinados contra de s’influèntzia, sos pitzinnos si depent acumpangiare a sos ambulatòrios subra indicados, sentza prenotatzione e cun sa tèssera sanitària, ma in sas dies e oràrios prevididos pro s’ambulatòriu pediàtricu. In Aristanis s’ambulatòriu (carrera Carducci, n. 35) est abertu dae su lunis a sa chenàbura, dae sas 8.30 a sas 12.30.
Pro sas persones chi non podent caminare, si podet prenotare de fàghere su vatzinu in domo telefonende a sos nùmeros chi bi sunt in su situ internet www.asloristano.it o faghende∙ddu prenotare dae sos familiares o assistentes in su tzentru vatzinale de riferimentu.
Sas persones chi ant fatu sa de bator o de chimbe doses anti-Covid dae pagu podent fàghere su vatzinu contra de s’influèntzia sentza lassare passare tempus tra unu vatzinu e s’àteru.
Sos antzianos e fràgiles (cun maladias respiratòrias, cardìacas o diabèticas) che cherent fàghere su vatzinu anti-pneumococcicu si podent vatzinare gratis paris cun cussu contra de s’influèntzia.
Si su dotore de famìllia at aderidu, podet èssere fintzas issu chi faghet su vatzinu contra de s’influèntzia.
(MM)
