Dae su 14 de freàrgiu finas in su Distretu de sa provìntzia de Aristanis totu sas telefonadas de emergèntzia e sas richiestas de agiudu ant a èssere imbiadas a su NUE, su Nùmeru Ùnicu Europeu 112.
Est su chi est essidu a campu in sa riunione fata in Prefetura, in presèntzia de sos dirigentes de sas Fortzas de Politzia, de sos Vìgiles de su Fogu, de sa Capitaneria de Portu e de sos rapresentantes de s’Areus, pro ispiegare su sistema ùnicu nou de emergèntzia, giai postu in movimentu a bellu a bellu e cun bona resurtada in àteros Distretos sardos e destinadu a remplasare pro semper sos nùmeros de emergèntzia impreados finas a como (pro esempru su 113, su 115 e su 118).
Sa tzentrale ùnica telefònica sarda at a impreare tecnologias informàticas modernas e at a permìtere a s’operadore, pro mesu de unu sistema nou de localizatzione, de inditare luego sos movimentos de s’utente in dificultade e de indiritzare sa pedida de agiudu a sas tzentrales operativas de Politzia, de Carabineris, sos Vìgiles de su Fogu, Capitaneria de Portu o Servìtziu 118, minimende meda sos tempos de interventu.
In prus, b’at a àere unu servìtziu de intèrpretes chi at a permìtere de bortare luego sas pedidas de agiudu.
“Semus imbàtidos a un’obietivu importante, chi totus cherìamus – ispiegat su prefetu de Aristanis Fabrizio Stelo – chi est un’esempru rapresentativu de sas finalidades importantes a in ue si podet imbàtere cando totu sas istitutziones traballant paris”.
(GF.P.)
