Su 2022 finit cun duas novas bonas pro su sistema de sos benes culturales aristanesos: su Comune de Aristanis e sa Fondazione Oristano tenent destinados 700mìgia èuros in su PNRR (Piano Nazionale Ripresa e Resilienza), de impreare pro su museu Antiquarium Arborense.
“Sunt duos progetos chi, postos paris, ant a permìtere de annoare de su totu s’Antiquarium Arborense, pro pònnere prus in evidèntzia sas colletziones suas e s’istòria de Aristanis – ispiegat su sìndigu Massimiliano Sanna -. S’interventu prus importante est cussu de mesu millione de èuros assignadu a sa Fondazione Oristano pro su Museu Antiquarium Arborense e finantziadu dae unu bandu chi punnaiat a nde bogare sos impedimentos fìsicos, cognitivos e sensoriales dae sos museos e dae sos logos de sa cultura pùblica chi no apartenent a su Ministeru de sa Cultura. Ma cussu de 200mìgia èuros, binchidore de su bandu pro sas tzitades de arte piticas e mèdias e pro sas biddas chi ant tentu minimadu su tràficu turìsticu pro neghe de s’epidemia de Covid-19, intrat in coerèntzia prena cun s’àteru interventu de promotzione de s’Antiquarium”.
“Su progetu l’ant fatu sos ufìtzios de sa Fondazione e sa sotziedade Rete Gaia, chi tenet esperièntzia de consulèntzia e progetatzione pro s’isvilupu locale e sustenìbile” agiunghet su presidente de sa Fondazione Oristano Francesco Deriu.
Su progetu punnat a modernare su museu e a lu megiorare pro permìtere a totus de godire de su logu, eliminende sas barrieras architetònicas e megiorende s’espositzione.
S’ant a impreare materiales e tecnologias chi rispetant s’ambiente, comente est prevìdidu dae sos obietivos de s’agenda 2030 de isvilupu sustenìbile. Sos megioros ant a permìtere de fàghere partetzipare mègius sos istudiantes, chi giai dae como andant a visitare su museu.
Su segundu progetu, finantziadu cun 200mìgia èuros dae su bandu pro sas tzitades de arte piticas e mesanas e pro sas biddas chi ant bidu minimadu su turismu pro neghe de s’epidemia de Covid-19, l’ant assignadu a su Comune de Aristanis.
“Su progetu, curadu dae su Comune e dae sa Fondazione Oristano, cheret agiuare a pònnere in evidèntzia su patrimòniu artìsticu de sa tzitade - narat s’assessore a sa Cultura Luca Faedda -. Sas colletziones de s’Antiquarium Arborense custoint benes istòricu-artìsticos importantes meda de sa tzitade de Aristanis (pinturas, isculturas, prendas, vasos e trastos de interru de calidade artìstica manna)”.
In su 2021 s’Antiquarium l’ant inseridu in su Sistema Museale Natzionale, a cunfirma de s’importàntzia de s’istòria sua, de sa richesa de sas colletziones chi bi sunt e finas de sa calidade de s’oferta culturale chi, finas gràtzias a sa comunicatzione web e social, est apretziada meda dae sa gente. Est pro custu chi tocat a agiornare sa manera de presentare sa cosa, faghende cullegare su museu a mètodos e limbàgios noos chi permitant de gosare mègius de cussos siddados.
(GF.P.)
