Dae su 4 de làmpadas, pro 4 meses, s’at a fàghere su Fèstival de sos Giòvanos, una manifestatzione aprontada dae sa Consulta Giòvanos de Aristanis paris cun sos Assessorados a sas Polìticas giovaniles e a sos Servìtzios sotziales de su Comune de Aristanis, cun sa Pro Loco e cun sa Cùria de s’Archipìscamu.
Sa manifestatzione at a dedicare momentos a s’arte, a s’ispetàculu, a s’impresa, a sa formatzione, a s’ambiente e a s’isvilupu.
Su Fèstival s’at a fàghere in pratza de sa Sea (dae annos meda est su logu in in ue si riunint e passant su tempus sos prus giòvanos, màssimu in istiu) e in Toràngius.
Su primu apuntamentu est pro sàbadu 4 de làmpadas cun un’eventu artìsticu de importàntzia regionale e natzionale chi at a fàghere bènnere a Aristanis sos mègius artistas chi sunt comintzende a si fàghere a connòschere.
In sos meses chi benint, sos giòvanos ant a tènnere sa possibilidade de si cunfrontare cun imprendidores, formadores e aziendas locales in contu de temas comente s’organizatzione aziendale, sa mentalidade e àteros temas cullegados.
A pustis s’at a puntare s’atentzione subra s’ambiente cun una gara a regòllere s’arga chi at a assignare prèmios a chie nde regollet de prus.
In ùrtimu s’at a fàghere una fiera dedicada a s’isvilupu, pro chircare artistas, inventores e ideas noas pro su territòriu.
“Su Fèstival naschet cun s’intentu de fàghere partetzipare in manera ativa sos giòvanos – ispiegat Nicola Pusceddu chi at progetadu s’initziativa in sa Consulta de sos Giòvanos -. S’assessore a sas Polìticas giovaniles Maria Bonaria Zedda at connotu luego su valore de su progetu nostru e s’est interessada a onni fase de s’organizatzione. Totu sos giòvanos de sa Consulta comintzende dae su presidente Antonio Meloni, gasi comente sa Cummissione de sos Servìtzios sotziales, sunt istados ativos meda aprontende unu bellu programma”.
“Sos giòvanos devent intrare in parte in custa filera de atividades interessantes, agiuende in onni momentu a las fàghere – sighit Pusceddu -. Cun su Fèstival cherimus dare valore a sa pratza de sa Sea, prenende.la de atividades culturales e faghende crèschere sas atividades de formatzione e informatzione”.
“Traballamus pro chi su Fèstival siat un’apuntamentu fissu, una festa de sa tzitade. Cherimus formare unu grupu de traballu aunidu e cherimus èssere unu puntu de riferimentu pro sos giòvanos de Aristanis” finit Pusceddu.
(GF.P.)
