In su mese de austu tres de sas testùines cun su dispositivu satellitare iscapadas in su mare de Santu Juanni Sinis (Crabas) su 9 de santugaine 2021 fiant sighende a trasmìtere sa positzione issoro.
Elettra est andada cara a di Gibilterra, e fiat a pagos chilòmetros dae sa costa de su Maroco. Dae sa die chi est istada iscapada a su mese de austu aiat fatu prus de 4000 chilòmetros e dae sos pagos datos de immersione trasmìtidos s’ischit ca sos profilos de immersione e sos tempos de apnea sunt regulares.
Gavinu s’est istesiadu dae sas costas de s’Àfrica e est andende cara a s’Amèrica Tzentrale. At fatu prus o mancu 5500 chilòmetros e dae sas informatziones trasmìtidas dae su dispositivu s’ischit ca sas immersiones sunt regulares e chi a bortas lompent a sos 40 metros de profundidade.
Genoveffa fiat firma unas cantas chidas in su tretu de mare tra Sardigna,Tunisia e Algeria e si fiat acostende a s’Àfrica. In totu at fatu prus de 2100 chilòmetros e sos datos mustrant immersiones regulares fintzas a 60 metros de profundidade.
In prus de custas testùines compidadas cun satellitare, dae pagu b’est fintzas Aurora, una fèmina – non pitica – chi unu piscadore at agatadu in sa rete pischende in su Golfu de Aristanis in su mese de ghennàrgiu e chi est istada iscapada su 20 de trìulas 2022, semper in Santu Juanni Sinis.
Dae su dispositivu satellitare postu a Aurora s’ischit ca, unu mese a pustis chi dd’aiant iscapada fiat semper in su Golfu de Aristanis, ogni dies s’ispostaiat de pagos chilòmetros sighende a abarre in sos fundales bassos.
(Dae su situ istitutzionale de sa Regione)
(MM)
