Su Comune de Aristanis non perdonat prus a sos chi imbrutant sa tzitade. A pustis de sas ordinàntzias e de sas campagnas de comunicatzione pro dare cussèntzia ambientale a sa gente, como benint sas multas.
“Est su momentu de sa tolleràntzia zero” annùntziant su sìndigu Massimiliano Sanna e s’Assessore a s’Ambiente Maria Bonaria Zedda chi, paris cun su Cumandu de Politzia tzitadina, ant programmadu una sèrie de interventos de protetzione de su decoro de sa tzitade. Ant a controllare sos terrinos isbandonados, su rispetu de sos parcos tzìvicos e de sas normas pro passigiare sos canes, chi si rispetent sas règulas fulliende.nche s’arga, chi non s’impreent bitzicletas o monopàtinos in sas àreas pedonales. E pro fàghere totu custu, in prus de sas patùllias ambientales in giru peri sas carreras, b’at a àere finas unu sistema de videosorvegliàntzia e unu drone.
“Sas règulas las tenimus dae ora e totus las ischint – ispiegat su sìndigu Massimiliano Sanna -. B’at ordinàntzia e, in antis de sas ordinàntzias, b’at règulas elementares de bona educatzione. Nois agiuamus a chie cheret traballare cun nois e cheret rispetare sas règulas, ma semus prontos a pònnere multas a chie no las rispetat. Su Comune dae annos meda est ponende dinari pro fàghere operatziones de comunicatzione e de educatzione ambientale e non si podet nàrrere chi finas a como non siamus istados passentziosos, ma como tocat de dare unu signale forte a chie no atzetat sas règulas”.
“Sos tzitadinos educados sunt meda: rispetant sas règulas, faghent sa regorta diferentziada in manera giusta sena nche betare s’arga in ue totu càpitat, innetant sos logos isbandonados, pudant sas matas e cando nche leant su cane a passigiare giughent su sachitu pro nde regòllere sa brutesa – ponet in craru s’assessora Zedda -. Pròpiu pro non torrare a nudda s’impignu de custos tzitadinos devimus punire sos chi no atzetant sas règulas pro bìvere paris in manera tzivile. Sos agentes de sa Politzia locale ant a fàghere prus controllos e ant a èssere prus pagu passentziosos cun chie isgarrat. Sas règulas de su decoro urbanu cherent rispetadas”.
“S’ùrtima campagna de comunicatzione, sa chi semus faghende como, est fata pro provocare: tenet unu messàgiu craru e invitat sa gente a tratare sa tzitade, sas carreras e sas pratzas, sos parcos e totu sos logos pùblicos comente chi siant domo issoro. Ca sa tzitade est domo issoro, domo nostra e mèritat rispetu dae totus onni die – sighit s’assessora Zedda -. Bastat unu pagu de agiudu dae parte de totus pro no imbàtere a provedimentos severos. In istiu, si non si contivigiant sos parcos bi podet nàschere fogos, podent crèschere insetos e sòrighes, bi podet àere unu decadimentu ambientale chi podet èssere perigulosu finas pro s’òmine. Totu s’annu agatamus muntonàrgios abusivos, carreras prenas de brutesa de animales, matas chi ammuntant sas banchinas e non permitint a sa gente de passare, màssimu a chie tenet problemas de disabilidade. Tropu bortas sas règulas elementares non sunt rispetadas. Sos agentes de Politzia locale sunt monitorende sa tzitade e sunt esaminende sas situatziones prus crìticas, e contra de custas ant a mòvere sas multas. In custos controllos nos ant a agiuare finas sas ripresas de deghinas de telecàmeras de sa retza de videosorvegliàntzia comunale, e dae inoghe a pagu tempus finas unu drone pro sas ripresas aèreas”.
Pro chie non rispetat sas règulas de su decoro urbanu sa multa andat dae unu mìnimu de 25 a unu màssimu de 500 èuros.
Su personale de sa Politzia locale e de s’Assessoradu a s’Ambiente est a disponimentu de sos tzitadinos pro informatziones e crarimentos pro su rispetu de sas normas.
(GF.P.)
