Pro sàbadu 27 de cabudanni 2025, a sas 11.00 de mangianu, in s’Àula Magna de s’Istitutu Tècnicu “Lorenzo Mossa” de Aristanis (in sa bia Senadore Carboni), sa Provìntzia de Aristanis pro sas atividades de s’Isportellu linguìsticu (Avisu R.A.S. Tu.Li.S. 2024) at cuncordadu un’addòbiu cun sennor Beniamino Zuncheddu e cun s’avocadu Mauro Trogu. Pro su valore educativu de custa istòria dolorosa, s’addòbiu est istadu organizadu pro sos istudiantes de sas classes V de sos Istitutos superiores de Aristanis, ma podet partetzipare chie si siat siat interessadu.
Sennor Zuncheddu at a contare sa vida sua chi est s’istòria de un’innotzente cundennadu a s’ergàstolu chi in presone est abarradu 33 annos. Custu errore giuditziàriu e sos annos passados in presone sunt contados in su libru “Io sono innocente. Storia di un uomo incarcerato ingiustamente per 33 anni e dell’avvocato che ha lottato per la sua libertà” (De Agostini, 2024) chi at a èssere presentadu in s'addòbiu.
