Su 21 de maju est sa Die Mundiale de sa diversidade culturale pro s’intesa e s’isvilupu. Custa ricurrèntzia est istada decrarada in su 2002 dae s’Assemblea Generale de sas Natziones Unidas a pustis de àere adotadu sa Decraratzione Universale de sa Diversidade Culturale, chi ponet in craru sa netzessidade chi tenimus chi sa cultura crescat ca est aina profetosa pro s’isvilupu sostenìbile, pro sa prosperidade e sa paghe in su mundu.
Comente est iscritu in s'art. 1 de sa Decraratzione: "Sa cultura tenet formas diversas in su tempus e in sos logos diferentes. Custa diversidade est s’identidade de sos grupos e de sas sotziedades de su gènere umanu, est vària, diferente e ùnica pro ognunu. Cantu sa biodiversidade in sa natura, sa diversidade culturale est netzessària a s’umanidade: est iscàmbiu, rennou e creatividade. Custu cheret nàrrere ca est unu patrimòniu comune de s'umanidade e depet èssere connotu e tentu in consideru comente benefìtziu de sa generatzione presente e de cussas de su tempus benidore".
Sa diversidade culturale est una richesa pro sas vidas nostras, si faghet crèschere bene in un’ambiente, fintzas comente economia, mègius e in paghe.
Sa Die est ocasione pro pensare e resonare ca est de importu amparare sa diversidade e pro cumprèndere e imparare a bìvere paris in paghe, cun limbas, culturas e religiones diversas. Sa paghe, in paghe… tres partes de bator de sas gherras e cuntierras internatzionales sunt pro more de aspetos culturales diferentes e chi non si cherent atzetare. E gherras e cuntierras faghent dannu mannu a s’isvilupu.
(MM)
