Su Comune de Aristanis e s’ANPI, paris cun sas autoridades provintziales e cun sas iscolas, su 27 de ghennàrgiu ant a ammentare sa Die de sa Memòria cun tantas propostas in ammentu de sas persecutziones e de s’istermìniu de sos ebreos.
In Pratza de Citadi (piazza Eleonora), in su giardinu a cara a sa crèsia de Santu Frantziscu, a sas 9 e mesa de mangianu su sìndigu Massimiliano Sanna at a pònnere una corona de frores a curtzu a sa targa e a s’Àrbore de sa Memòria chi ammentat cussu disacatu.
A sas 10 in s’Hospitalis Sancti Antoni s’at a fàghere un’atopu cun sos istudiantes. A pustis de su saludu de sas autoridades at a faeddare sa presidente provintziale de s’ANPI Carla Cossu cun una riflessione intitulada “Meditate che questo è stato”. A pustis s’at a fàghere sa projetzione de su film “La conferenza” (2022).
A sas 5 de sero (h 17) in su Tzentru de Servìtzios Culturales UNLA in carrera Carpaccio s’at a fàghere sa projetzione de su film “Resistance la voce del silenzio”. Marcello Marras at a coordinare sa serada e Carla Cossu at a presentare su film.
Mèrcuris 1 de freàrgiu semper in su Tzentru de Servìtzios Culturale UNLA in carrera Carpaccio s’at a fàghere sa projetzione de su film “Lo Stato contro Fritz Bauer”, presentadu dae Marcello Marras.
Sa Die de sa Memòria est una commemoratzione internatzionale e si faghet su 27 de ghennàrgiu de onni annu (in sa die chi sos sordados de s’Armada Ruja aiant liberadu su campu de cuntzentramentu de Auschwitz) pro ammentare a sos mortos de s’Olocàustu, a totu sos chi nd’ant tentu dannu e a totu sos chi l’ant cuntrastadu. In Itàlia l’ant istituida cun una lege de s’Istadu in su 2000.
(GF.P.)
