Su 22 de austu est sa die chi s’Assemblea Generale de sas Natziones Unidas at seberadu pro ammentare, ogni annu, sas vìtimas de violèntzia pro sa religione chi pràticant e pro su Deus chi pregant. Ancora b’at gente chi morit, est minetzada o persighida o agredida pro praticare de una religione chi no andat bene a àtere.
In totu su mundu sunt meda sas persones chi sufrint penas mannas e agatant fintzas sa morte pro more de s’identidade religiosa issoro; gente chi non podet praticare e partetzipare a sos ritos e sas pràticas de sa religione chi at seberadu e chi intendet in su coro, chi non nde podent sighire sa dotrina. Totu custu non si podet atzetare.
S’ONU e s’Unione Europea sunt a favore de sa libertade de religione e s’impignant pro chi in totue ognunu potzat seberare a manera lìbera cale religione praticare e pro chi sas religiones diferentes si potzant cunfrontare e potzas faeddare e resonare paris. Custu est unu diritu iscritu in craru fintzas in sa Decraratzione de sos diritos umanos de sas Natziones Unidas (artìculos 18, 19 e 20).
S’Unione Europea finàntziat progetos chi favoressent sa libertade de religione e gherrat pro firmare cale si siat atzione de òdiu e persecutzione.
Àere istituidu custa ricurrèntzia est de importu mannu ca ponet in craru ca su problema esistit e sas istitutziones internatzionales, chi tenent su dovere de amparare sa libertade de religione e fàghere acabbare sas violèntzias, si podent e si depent mòvere, si podent e si depent organizare pro cambiare sas cosas a favore de sa paghe, fintzas, religiosa.
(MM)
