Dae su 2003, s’Organizatzione internatzionale de su Traballu (ILO), chi est un’agentzia ispetzializada de sas Natziones Unidas chi s’interessat de giustìtzia sotziale e diritos umanos connotos in totu su mundu e prus che totu de cussos chi pertocant su traballu, tzèlebrat sa Die mundiale pro sa salude e sa seguresa in su traballu pro ammentare ca tenimus sa netzessidade de mudare cosas meda pro chi siant semper prus pagos sos mortos e sos chi s’ismalàidant in su traballu. Est de importu chi si traballet in seguresa: sa mèdia est, ancora a dies de oe, de 6.000 mortos a sa die e in prus sunt medas sas maladias causadas dae su non rispetare sas règulas pro amparare sa salude. In totu su mundu, ogni annu, in su traballu e pro su traballu morint meda prus de 2 milliones de persones: sunt meda, no est unu nùmeru chi si podet atzetare. Est unu dannu mannu e una suferèntzia manna pro sas vìtimas e pro sas famìllias issoro; est unu dannu pro sas impresas, pro sos guvernos, pro su mundu: ispesas e dannos econòmicos, dies de traballu pèrdidos, ispesas sanitàrias, asseguratziones, personale calificadu chi mancat, traballu e produtziones firmados. E b’at disgràtzias meda chi si podent evitare.
Totus, in totu su mundu, tenimus sa responsabilidade de fàghere carchi cosa pro firmare sas mortes, sas maladias e sos intzidentes de e in su traballu.
- Sos guvernos depent dare servìtzios e leges netzessàrios pro sa salude e sa seguresa de sos traballadores e cando bi sunt leges e servìtzios tocat a fàghere ispetziones pro assegurare su rispetu de sas règulas.
- Sos meres de su traballu tenent sa responsabilidade de assegurare chi in ue si traballat, s’ambiente de su traballu siat seguru e sanu.
- Sos traballadores tenent sa responsabilidade de traballare in seguresa issos etotu e de non pònnere in perìgulu fintzas sos àteros, de respetare sa preventzione.
Est prus profetosu a traballare in un’ambiente seguru e sanu: in prus de s’amparu de sa salude , est prus fàtzile a collaborare e s’agiudare pare pare, b’est prus cunfiantza e respetu.
Su 28 de abrile est fintzas sa Die internatzionale pro ammentare sos mortos e istropiados in su traballu, organizada dae su movimentu sindacale dae su 1996.
(MM)
