S’Organizatzione Mundiale de sa Sanidade (OMS) at proclamadu sa Die mundiale de sos chi donant su sàmbene su 14 de làmpadas de ogni annu ca in custa data est nàschidu su biòlogu austrìacu Karl Landsteiner chi, in su 1900, at iscobertu su sistema AB0 e, paris cun àtere, su fatore Rhesus.
Sas manifestatziones cuncordadas in custa die serbint pro sensibilizare sa gente in contu de s’importu mannu chi tenet sa donatzione gratùita de su sàmbene a favore de malàidos meda e chi est fintzas un’agiudu mannu pro sos sistemas sanitàrios natzionales.
Donare su sàmbene a manera gratùita e voluntària afòrtiat sa solidariedade in sas comunidades e fintzas pro custa resone est de importu:
- torrare gràtzias a sos donadores de totu su mundu;
- favorèssere sas donatzione de su sàmbene voluntàrias e gratùitas, non pagadas;
- chi bi siant donatziones totu s’annu pro chi su sàmbene non manchet e bi nde siat semper a disponimentu pro cale si siat netzessitade;
- fàghere a cumprèndere a sos guvernos ca serbint prus agiudos in dinare pro chi sas donatziones siant semper de prus e sos sistemas trasfusionales natzionales siant semper mègius.
S’AVIS natzionale ocannu cuncordat in Roma su cunvegnu “Donare su sàmbene est unu gestu de solidariedade. Beni cun nois pro sarvare vidas”, chi est fintzas s’islogan de sa Die mundiale 2022.
(MM)
