Su Comune de Aristanis aderit a sa prima Die natzionale “Giòvanos e memòria” chi si faghet in totu Itàlia lunis 31 de santugaine.
Istituida cun sa lege 234 de su 30 de nadale 2021, sa Die tenet sa punna de afortigare sos valores cullegados a sa memòria istòrica, faghende partetzipare sos giòvanos a custa connoschèntzia pro mesu de sos limbàgios contemporàneos e sas tecnologias noas.
“Aderimus a s’eventu permitende s’intrada gratùita a sas istruturas museales e culturales nostras a totu sos giòvanos chi non tenent ancora 35 annos – ponet in evidèntzia s’assessore a sa Cultura de su Comune de Aristanis Luca Faedda -. S’obietivu est su matessi de sa lege: fàghere a manera chi sos giòvanos siant protagonistas de unu protzessu de irrichimentu culturale, de mantenimentu e valorizatzione de sa memòria istòrica de su Paisu pro fraigare s’identidade nostra, fàghere de puntòrgiu pro unu cras, pro mesu de canales de comunicatzione diversos e espressivos”.
Sas istruturas postas a disponimentu dae s’Assessoradu a sa Cultura e dae sa “Fondazione Oristano” sunt su museu “Antiquarium Arborense”, su Tzentru de Documentatzione de sa Sartìglia e sas Turres de Marianu e de Portixedda.
(GF.P.)
