Cun una comunicatzione mandada a su sìndigu Massimiliano Sanna, a sa Giunta comunale, a su presidente de su Cussìgiu comunale e a su segretàriu generale, Giovanna Bonaglini at formalizadu sas dimissiones dae s’incàrrigu de assessore comunale a sos Servìtzios Sotziales.
“Cun custa lìtera comùnico sas dimissiones mias dae sa càrriga de assessore. Custas dimissiones sunt definitivas e pro resones personales ebbia – si leghet in sa lìtera -. Torro gràtzias a su sìndigu ca m’at dadu sa possibilidade de fàghere custa esperièntzia curtza ma forte, pro sa fidùtzia e pro s’istima dispensada cun megus e ricambiada in sa matessi manera, chi at a abarrare finas in sas dies chi ant a bènnere. Torro gràtzia a totu sos de sa Giunta, ca amus aviadu unu raportu de cunfidèntzia e de acordu in sos sèberos chi amus fatu. M’est òbligu de espressare s’istima mia pro sos cussigeris de majoria e de opositzione pro s’impignu issoro. Gràtzias a totu sos dipendentes comunales, in particulare a sos de su setore meu de riferimentu pro sa disponibilidade manna issoro. Gràtzias a su segretàriu generale ca at mustradu semper umanidade e gentilesa manna. Abarrende semper a disponimentu pro su chi potzo fàghere, àuguro a totus bonu traballu”.
(GF.P.)
