Su Comune de Aristanis at comintzadu s’iter pro istituire e disciplinare un’elencu de persones pro fàghere s’amministradore de agiudu delegadu dae su giùighe tutelare o dae su sìndigu.
S’elencu tenet sa finalidade de agiuare su Comune de Aristanis in s’adempimentu de sa funtzione (assignada dae su Tribunale Ordinàriu) de agiudu e tutela a sas categorias chi sighint:
- gente chi, pro neghe de maladia fìsica o psìchica o pro àtera resone, non tenet possibilidade de contivigiare sos interessos suos, mancari in parte o pro pagu tempus;
- chie tenet prus de 18 annos e, pro infirmidade mentale, non podet amministrare a sa sola sos interessos suos.
Su Comune podet propònnere a s’autoridade giuditziària sos nùmenes pro un’incàrrigu deretu o pro sostituire sos òrganos comunales in s’amministratzione de agiudu o in sa tutela.
Pro presentare domanda, in prus de sos caràteres generales, tocat de no àere tentu cundennas penales e/o protzedimentos penales in atu, de tènnere cumportamentu onestu comente est ispiegadu in su Còdighe Tzivile, de no èssere in una de sas cunditziones de incapatzidade pro custu incàrrigu a tenore de su Còdighe Tzivile, de tènnere una làurea in matèrias giurìdicas, econòmicas, umanìsticas e sotziales e de tènnere una bona esperièntzia in matèria, bene documentada, cun prova de àere tentu in sos ùrtimos tres annos incàrrigu de amministradore de agiudu incarrigadu dae su giùighe tutelare o cun dèlega formale dae sos amministradores.
Non si bi podet iscrìere gente chi non tenet amministratzione lìbera de su patrimòniu suo, gente giai esclùdida dae atividades de tutela o de amministratzione de agiudu pro resones graves, pro gestione incumpetente o pro mancàntzia de capatzidade de fàghere custu còmpitu. No lu podent fàghere mancu sos chi sunt decadidos o suspesos dae sa podestade de genitores o chi sunt bogados dae àtera tutela, sos chi sunt in cunflitu de interessu cun sa persone chi tenet bisòngiu de tutela o amministrada, o pro àteras resones graves.
S’incàrrigu est sena paga, in s’interessu de chie nde tenet benefìtziu. Si s’amministradu tenet patrimòniu mannu, s’amministradore de agiudu nominadu dae su Giùighe Tutelare podet pedire de otènnere un’indennidade giusta a rimborsu de sas ispesas, in forma non de retributzione ma pro pòdere cumpensare sas ispesas.
Si chie est benefitziadu non tenet patrimòniu, si podet tènnere unu rimborsu forfetàriu finas a 1.000 èuros determinadu a tenore de sos critèrios prevìdidos in s’avisu.
S’avisu pùblicu cumpletu, cun su modellu de domanda e s’informativa pro tratare sos datos, si podet agatare in su situ istitutzionale de su Comune.
Chie est interessadu podet mandare domanda, cumpilada in su mòdulu suo e fornida de sos documentos pedidos, a s’indiritzu istituzionale@pec.comune.oristano.it intro de su 31.03.2023.
(GF.P.)
