Cun Deliberatzione 15/1 de su 2 de maju 2022, sa Giunta Regionale at aprovadu sos disponimentos regionales pro s’amparare dae sos fogos pro su 2022.
Dae su 1u de làmpadas a su 31 de santugaine, in totu su territòriu regionale, est in vigore su perìodu de “perìgulu artu meda pro su fogu in su sartu”, chi podet èssere mudadu, a segunda de comente at a èssere su tempus de s’istajone, fintzas in sos tretos pretzisos de su territòriu.
Sas novidades de ocannu sunt:
- s’essida de su Bulletinu de previsione emanadu dae su Tzentru Funtzionale Detzentratu de Protetzione Tzivile antitzipada a su 15 de maju;
- sas zonas de allerta dae 26 sunt diventadas 25 e sas làcanas de unas cantas sunt istadas mudadas. Custu at a permìtere de afortigare s’eficatzidade de sos còditzes colore de sos bulletinos de perigulosidade, a vantàgiu de totu su Sistema de protetzione tzivile e de sa populatzione.
- in cunfrontu a cando si santzionaiant ebbia sas atziones de arriscu pro sos fogos, sos disponimentos normativos mudados in s’atòngiu 2021 ant a permìtere de santzionare fintzas cussas atziones chi podent, fintzas ebbia a manera potentziale, fàghere iscapare su fogu, previdende, pro sos trasgressores, santziones dae sos 5.000 a sos 50.000 èuros (comente prevididu dae s’artìculu 10 de sa L. 353/2000 - modificadu dae su D.L. 120/2021 e cunvertidu, cun modificatziones dae sa L. 155/2021 - e dae s’artìculu 24 de sa L.R. 8/2016).
Sas normas de preventzione, de ddas atuare a intro de su 1u de làmpadas, pertocant a meres, afitevoles e gestores de:
- fràigos e terrinos de cale si siat categoria de impreu de su terrinu, fundos agrìculos e culturas;
- àreas cun sistema de istradas e ferrovia comente A.N.A.S. S.p.a., Amministratziones ferroviàrias, Provìntzias e Cunsòrtzios industriales e de bonìfica;
- rifornidores e depòsitos de carburante, linna, ardone, fenu o àteros materiales chi podent leare fogu o combustìbiles;
- eletrodotos;
- istruturas pro retzire, comente albergos, agri/iti/pescaturismu, condomìnios, comuniones privadas;
- discotecas, locales pro ispetàculos e su recreu.
In prus, in sos disponimentos b’est una disciplina ispetzìfica chi pertocant sas manifestatziones de sos fogos de artifìtziu in su perìodu de “perìgulu mannu meda”, chi previdit chi custas manifestatziones depant èssere autorizadas dae su Servìtziu Territoriale de su CFVA cumpetente pro territòriu, in antis de àere mandadu sa domanda formale a su nessi 15 dies in antis de s’ispetàculu.
Fintzas pro su 2022 tocat a s’afidare a s’Agentzia FoReSTAS chi, francu sa prioridade de s’atividade de preventzione ordinària, collàborat a sas atividades de preventzione in sos territòrios de su demàniu de cumpetèntzia de sa Regione Sardigna e de sos Comunes.
Ebbia si tenent su pianu comunale de protetzione tzivile pro su perìgulu de sos fogos oru oru de sas biddas o acanta de sa bidda, sos Comunes ant a pòdere essere agiudados, si pedidu, in s’atividade de preventzione de cumpetèntzia, in base a unu progetu chi miret a minimare s’arriscu de sos fogos. Su progetu at a èssere elaboradu respetende unas cantas prioridades, in relatzione a sa presèntzia de insediamentos tziviles, turìsticos, industriales e giassos abbuscados.
Fintzas a sos Comunes chi tenent su pianu comunale de protetzione tzivile pro su perìgulu de sos fogos oru oru de sas biddas o acanta de sa bidda est netzessàriu garantire sa possibilidade de impreare òmines e mezos de sas Organizatziones de voluntariadu chi tenent sede in su matessi Comune, pro sas atividades de preventzione contra de sos fogos e garantire su rimborsu de sas ispesas tentas .
Sas Organizatziones de Voluntariadu depent èssere iscritas a manera regulare in s’Elencu regionale de su voluntariadu de protetzione tzivile, istituidu in sa Diretzione Generale de sa Protetzione Tzivile (DGR n.21/30 de su 05.06.2013) e, in prus, èssere operativas pro sa categoria AIB in s’Elencu regionale 2022.
Sa publicatzione de sos disponimentos contras de sos fogos, in su situ istitutzionale de sa Protetzione Tzivile e de sa Forestale e sa Vigilàntzia Ambientale est una de sas atividades de informatzione, sensibilizatzione e educatzione de sa populatzione chi tenent sa punna de afortiare sa cussèntzia ambientale pro ampare sos buscos chi sunt benes chi non si nde podet fàghere a de mancu pro sa calidade de sa vida.
Pro àteras informatziones:
Deliberatzione de sa Giunta Regionale n.15/1 de su 02.05.2022
Libreddu Disponimentos contras de sos fogos 2022 cun Allegados A-B-C-D-E
Allegadu A - Riferimentos Normativos
Allegadu B - Domanda Autorizatzione Manifestatzione Fogos de artifìtziu - Fac Sìmile
Allegadu C - Domanda Autorizatzione pro brusiare - Fac sìmile
Allegadu D - Lista de sos Comunes de Sardigna pro zonas de allerta
Allegadu E - Prontuàriu de sas santzione amministrativas
(dae su situ istitutzionale de sa Regione - MM)
