Su frori de Spànnia de su Sinis ammantat sceti 1,6 etàrus de terra acanta de sa costa de su Sinis (Salina Manna e Pauli Marigosa), is fundus de s’erba no arribant a 100, po custa arraxoni est cunsiderada erba a arriscu mannu de si sperdi in totu (perìgulu crìticu).
Nexi sa faina de s’òmini, traballendi sa terra, prantendi matas de opinu, ma nexi finas de is atividadis turìsticas e sportivas sena de arrègulas comenti a su ddui camminai asuba a pei, a bicicreta o a màchina, e nexi de ai fatu àteras bias o su de ndi ai pesau fraigus.
Custa erba crescit in cunditzionis de clima calenti e sicu in unu cucureddu carcàriu in mesu a àteras matas mediterràneas bàscias, sempribias spinosas chi ddis praxit s’ambienti àrridu.
Su frori de Spànnia de su Sinis est un’erba vitània a cambu deretu o pagu incurbau longu 15-20(30) cm.
Su cambu tostau ma chi si indullit est lisu o pagu piludu e portat sa folla intreverada de allonghiada e strinta a màrginis giai parallelas.
Est a 15-20 froris impari a pitzus de su cambu.
Sa corodda est assimètrica a pèdalus arrosa o biaitus longus 11-12 mm.
Frorit in su mesi de freàrgiu e de martzu e scudit su sèmini pagu apustis.
Su frori de Spànnia de su Sinis crescit anca bivit su satzaroi, sa tiria burda, su lati de pudda a duus froris, sa sitzia arrabiosa.
