“Peruna serradura, nen como ne a pustis, de su repartu de Meighina interna de s’ispidale de Santu Martine de Aristanis”. Lu ponet in craru su diretore generale de s’Azienda sotziu-sanitària locale n° 5 de Aristanis Angelo Serusi sa die in fatu chi in carchi mèdiu de informatzione sunt essidas sas novas in contu de sa serradura.
“Sas dificultades no las amus mai cuadas, e sunt comunes a totu s’Ìsula foras de sos tzentros sanitàrios de su Nord e Sud de Sardigna, cullegadas pro su prus a sa mancàntzia de dotores – afirmat su dirigente de sa Asl 5 -. Nointames de custu, in custos meses semus resèssidos a mantènnere e in carchi casu finas a afortigare sos servìtzios de sos ispidales cun assuntziones noas, comente est capitadu in urologia, oncologia, ginecologia, psichiatria, a garantire sas curas calmantes, a torrare a aviare atividades comente emodinàmica suspesa dae su 2021, pro nde nàrrere calicuna ebbia. In àteras situatziones, semus “resistende” e sighende sas atividades e sas curas comente est capitende como in Meighina, in una cunditzione provisòria chi benit dae su fatu chi unos cantos dotores si sunt ismalaidados totu paris”.
“Diamus chèrrere chi custu esseret craru a totu sa gente: pro more de una pelea fitiana de organizatzione, e pro more de s’impignu e de sa disponibilidade de su personale nostru, in Aristanis – a diferèntzia de àteros logos – custa diretzione no at serradu mai perunu repartu e amus semper atzetadu sos malàidos, finas in sos tempos prus crìticos – sighit Serusi -. Asseguramus a totus chi s’assistèntzia sanitària, in Aristanis e in totu sa provìntzia, est garantida e at a sighire”.
“A nàrrere chi sos repartos de Meighina in sos ispidales de Aristanis e de Bosa sunt serrados est fàula: in su primu, como bi tenimus unu nùmeru de malàidos chi sobrat sos 48 assignados dae sa Regione, in su segundu b’at prus o mancu 20 ricoverados – dennegat su diretore generale -. Est farsu finas a nàrrere chi s’ispidale de Ilartzi est serradu, ca dae su mese de cabudanni est torrada a comintzare s’atividade de chirurgia diurna, torrada a comintzare finas in Bosa in su mese de maju passadu. De su restu est grave chi decraratziones de custu tipu las fatzant siglas sindacales chi craramente sunt pagu informadas in contu de sas cosas, e est pagu generosu pro sos collegas chi onni die dant su prus chi podent, a su màssimu de sas energias issoro. Duncas dat ite de pensare su fatu chi cada a tantu essant custas novas de serraduras de repartos e de ispidales, semper isfauladas dae sos fatos ca in custos meses, torramus a nàrrere, no amus serradu nudda. Antzis tocat a ammentare chi su Santu Martine at paradu fronte in sos meses colados a sas serraduras periòdicas de àteros ispidales a curtzu”.
Su diretore faeddat a pustis de sa situatzione de sa sanidade territoriale e in manera particulare de sa mancàntzia de sos dotores de famìllia. “Subra custu argumentu amus impreadu e semus impreende totu sas solutziones chi sunt in podere nostru: amus artziadu sos massimales, creschende su nùmeru de malàidos chi si podent assistire dae 1500 a 1800 pro onni dotore; amus pedidu sa disponibilidade de sos dotores de guàrdia mèdica pro fàghere sas retzetas; amus fatu sos bandos de seletzione pro chircare professionistas noos in modalidade aberta, cun bandos a iscadèntzia, a manera de illargare s’àmbitu de atzione e sa possibilidade de inserire in cale si siat momentu disponibilidades noas finas a assegurare sos postos bòidos – ispiegat su diretore de sa Asl n° 5 -. Amus fatu e sighimus a fàghere totu su chi podimus pro garantire s’assistèntzia sanitària de base, a intro de un’àmbitu normativu e cuntratuale chi est de livellu natzionale e regionale”.
(GF.P.)
