Prus coinvolgimentu e una polìtica regionale sèria in contu de sos impiantos de produsidura de energias rinnovàbiles: lu pedint sos sìndigos de s’Aristanesu chi tenent sos territòrios issoro interessados dae unu progetu de eòlicu marinu chi proponet de pònnere 34 turres intre Bosa e Crabas. Sa proposta l’at presentada una sotziedade lombarda, sa Regolo Rinnovabili, a sa Capitaneria de Portu Turres.
Sa sotziedade at pedidu de li cuntzèdere pro trinta annos un’àrea de mare chi est agiomai mesu millione de metros cuadros e nch’est nessi 19 chilòmetros a largu dae sas costas de Santeru e de Bosa, e 18 chilòmetros dae s’ìsula de Malu ‘Entu in sa marina de Crabas.
Est sa de 14 propostas de eòlicu in mare artu fatu in sas marinas sardas. In sos meses passados un’àtera sotziedade, sa Acciona Energia Global Itàlia, aiat propostu unu progetu de 32 palas eòlicas de pònnere intre Capu Mannu e Capu Marràrgiu.
“Oe su progetu de sa sotziedade Acciona est firmu, comente totu sos àteros – at ispiegadu su presidente de s’assòtziu ecologista Grig, Stefano Deliperi – e semus prontos a nos opònnere finas a sa richiesta chi at presentadu sa sotziedade Regolo Rinnovabili. Sena de tènnere nudda in manos, custas sotziedades pedint chentinas e chentinas de ètaros de mare: custa est una cosa fata pro fàghere dinari. Mancat una pianificatzione energètica sèria in palas, fata in collaboratzione intre Istadu e Regiones. In prus, sas protzeduras pro pedire sas cuntzessiones non ponent in contu perunu sos Comunes interessados, nen sa Regione”.
Osservatziones e opositziones a su progetu de sa Regolo Rinnovabili si podent depositare intro de su 19 de ghennàrgiu.
In sos meses colados su Cussìgiu comunale de Bosa aiat votadu a s’unanimidade pro nàrrere “nono” a sas cuntzessiones demaniales marìtimas pedidas dae Acciona Energia Global Italia. “De custa richiesta noa no ischimus nudda – at cummentadu su sìndigu Piero Franco Casula – ma cunfirmamus s’opositzione nostra. No est tantu chi semus contràrios a s’eòlicu, cantu a sas maneras propostas”.
“Su progetu a fine a fine no l’apo bidu - at naradu su sìndigu de Santeru Luigi Tedeschi – però penso chi tochet a agatare sa sìntesi giusta intre sa netzessidade de impreare fontes de energia rinnovàbile e su bisòngiu de amparare su territòriu. Cherent analizadas bene sas propostas, valutende bene ite profetu nde podet tènnere su territòriu. Non diat tènnere sensu de manifestare unu giudìtziu ebbia ca est offshore”.
“S’amministratzione nostra no at tentu ancora manera de visionare su progetu – at agiuntu su sìndigu de Crabas Andrea Abis -. Sas comunidades locales cherent postas in parte de prus. Bi cheret un’impostatzione regionale sèria in contu de sas energias rinnovàbiles. A dare unu pàrrere sìngulu non penso chi siat unu sèberu bonu, depimus bìere sas cosas totu paris. In prus, in su territòriu nostru nch’at un’importante Àrea Marina Protetta, no isco si sa sotziedade chi at presentadu su progetu apat valutadu custa cosa”.
Su sìndigu de Cùglieri Andrea Loche at postu in evidèntzia sa netzessidade de una regia regionale o finas natzionale: “Custos progetos sunt semper imbatende, diat èssere importante a tènnere una regia superiore, nos diat permìtere de esaminare in manera sèria sa chistione, contende profetos e dannos. A esaminare sos progetos sena tènnere una visione generale no est sa manera giusta. Depimus agatare unu puntu mesanu, ca sas energias rinnovàbiles e s’amparu de s’ambiente depent andare paris”.
(GF.P.)
