In su Comune de Aristanis est ancora ativu su servìtziu de regorta dae domo in domo de sos refudos chi cuntenent amiantu.
“Su servìtziu l’at aviadu s’Assessoradu a s’Ambiente e est a disponimentu de sa gente pro agiuare a chie cheret eliminare sos materiales chi cuntenent amiantu, cun s’iscopu de minimare s’espositzione ambientale a custa sustàntzia perigulosa – ponet in craru s’assessora a s’Ambiente Maria Bonària Zedda -. In custa manera cherimus finas evitare chi sa gente lasset sos refudos perigulosos peri su logu, cun totu su chi s’arriscat a livellu sanitàriu”.
“A impreare su servìtziu est fàtzile – agiunghet s’assessora Zedda -. Chie nche cheret bogare produtos de amiantu in cantidades piticas (fumajolos, canales, lastras fresadas, serbatojos…) pro unu màssimu de 150 chilos de pesu devet ebbia presentare domanda a s’ufìtziu Protocollu de su Comune de Aristanis, impreende su mòdulu chi est in su situ internet de su Comune”.
Sa domanda la podet fàghere chie tenet residèntzia in Aristanis. S’amiantu devet èssere de insediamentos tziviles (non industriales o artesanales) e non devet èssere deterioradu.
Sas domandas, chi ant a èssere esaminadas in òrdine de arrivu finas a finire su dinari, si podent presentare in sas maneras chi sighint:
- Mandende una mail a s’indiritzu protocollo@comune.oristano.it ponende comente argumentu “Domanda per il servizio di microraccolta amianto”;
- Cunsignende manu pro manu a su protocollu de su Comune de Aristanis, in Pratza de Citadi (piazza Eleonora) 44;
- Cun racumandada A/R mandada a “Comune de Aristanis - Settore Sviluppo del Territorio – Ufficio Ambiente, Via Ciutadella de Menorca n. 19, 09170 Oristano”, in busta serrada e iscriende a dae segus “Contiene domanda per il servizio di microraccolta amianto” (tocat a pònnere finas su mitente);
- Pro chie tenet sa posta tzertificada, sa domanda si podet mandare finas a sa casella PEC istituzionale@pec.comune.oristano.it, ponende comente argumentu “Domanda per il servizio di microraccolta amianto”.
Pro àteras informatziones o crarimentos si podet telefonare su Servìtziu Ambiente de su Comune de Aristanis ( 0783/791617) o mandare una mail a s’indiritzu servizio.ambiente@comune.oristano.it.
(GF.P.)
