Est nàschidu su canale Informaimpresa de su Comune de Aristanis.
L’at chèrridu s’Assessoradu a sas Atividades Produtivas pro dare unu canale de connoschèntzia in prus a sas impresas de su territòriu, in su situ Internet istitutzionale nou chi dae oe tenet una pàgina dedicadu a bandos, avisos, novas e apuntamentos.
“Oe prus chi non mai est importante de istare a costàgiu de su mundu de sas impresas e de su traballu, pro assegurare sa ripresa de su territòriu – narat su sìndigu Massimiliano Sanna -. Sa proposta de s’Assessoradu a sas Atividades Produtivas est bona meda ca naschet pro agiuare sas impresas in unu momentu de dificultade manna causada dae sa pandemia e dae sa gherra. Sas emergèntzias sunt meda e depimus collaborare totus pro chi non si perdant sas oportunidades a disponimentu”.
“Sa connoschèntzia est importante meda in onni setore de sa sotziedade – ispiegat s’assessora a sas Atividades Produtivas Rossana Fozzi -. Màssimu pro chie faghet impresa, pro sas realidades produtivas e pro sos professionistas. S’Amministratzione comunale, aviende su canale Informaimpresa, cheret dare un’agiudu a chie traballat in su sistema de produtzione, ponende·si a costàgiu de sas impresas (màssimu sas prus piticas) cun un’informatzione simpre, crara e pronta. S’obietivu est de las agiuare faghende crèschere sa collaboratzione intre Comune e atividades produsidoras.”
Informaimpresa est in su situ istitutzionale de su Comune de Aristanis e òspitat sos bandos pùblicos indiritzados a sas impresas mèdias e piticas de su cummèrtziu, sas novas dedicadas a sos investimentos pro impiantos fotovoltàicos in su setore agrìculu, zootècnicu e agru-industriale, sos agiudos a impresas chi còmporant servìtzios in su setore creativu, sas novidades in agiudu de impresas tecnològicas in totu Itàlia e de sas impresas piticas in ue b’at giòvanos dae sos 18 a sos 35 annos o fèminas de onni edade.
“Cherimus fàghere a manera chi sa gente connoschet sos trastes chi esistint pro agiuare sa ripresa econòmica de s’Itàlia – sighit s’assessora Fozzi -. Sighimus cun atentu sas atividades de sos Ministèrios, de sa Regione, de s’Unione europea e de sas organizatziones chi pùblicant bandos e avisos chi podent agiuare sas impresas. A pustis chircamus de inditare, a chie nde podet tènnere profetu, sos assòtzios de categoria”.
“Su servìtziu pro como est una prova, ma in sos meses chi benint l’amus a crèschere cun trastes noos chi potzant fàghere impreare bene su patrimòniu de connoschèntzias chi nd’at a essire – finit s’assessora Fozzi -. S’at a pòdere aderire a protocollos de intesa e a formas de collaboratzione intre istitutziones cun sa punna de creare una retza e de isfrutare totu sas oportunidades chi s’agatant pro agiuare sos imprendidores nostros”.
Su link pro intrare in sa pàgina est custu: https://www.comune.oristano.it/it/argomenti/argomento/Imprese/.
(GF.P.)
