At fatu dexi annus ocannu, sa rassìnnia de cìnema Evò ce Esù Visioni Incontri di confine tra visi e parlate, sa sola in Puglia chi si interessat de cìnema me in is lìnguas de minoria. S'eventu dd'ant fatu me in is diis passadas in sa biddixedda de Martignano, in su Parcu Turìsticu Culturali Palmieri.
S'initziativa nascit de una idea de sa Coperativa sotziali Open de Parco Palmieri, de sa Cineteca Sarda e de su Babel Film Festival de Casteddu (cun is Assòtzius Babel, Terra di Punt e Area Visuale Film). Sa collaboratzioni cun is realtadis sardas e cun su Babel on Tour, permitit de fai una rassìnnia arrica meda chi rapresentat su cìnema in totu is lìnguas de minoria italianas e non.
Custu scàmbiu cun àteras realtadis chi ndi benint de àterus logus d'Itàlia e de su mundu, permitit de fai una retza chi aparìciat pontis e collaboratzionis, agiudendi fintzas in sa valorizatzioni e promotzioni de su territòriu.
Tra is tantis atòbius chi ant fatu in custu eventu, arregordaus ca su 14 de cabudanni, ant presentau My Culture + , sa primu prataforma vìdeu on demand me in is lìnguas de minoria.
Su 15 de su mesi de cabudanni s'est fueddau de unu progetu po sa nàscida de s'Assòtziu "Art. 6", unu enti chi at a pònniri in una retza unu nùmeru mannu de realtadis chi si òcupant de lìnguas de minoria in Itàlia. Nd'ant arrexonau Tore Cubeddu (Eja Tv – po sa lìngua sarda), Sabrina Rasom (Istitutu Culturali Ladinu – po sa lìngua ladina), Leo Virgili (Assòtziu Inniò po sa lìngua friulana) e Pantaleo Rielli (Open coperativa sotziali e Parco Palmieri po su griko), chi sunt sòtzius fundadoris de custu enti nou.
